ट्याक्टर दुर्घटना हुँदा चालकको मृत्यु

निसीखोला गाउँपालिकामा ट्याक्टर दुर्घटना हुँदा एक जनाको मृत्यु भएको छ। 

निसीखोला गाउँपालिका-६ रितिबाङमा मंगलबार बिहान रा १ त ४११६ नम्बरको ट्याक्टर दुर्घटना हुँदा उक्त ट्याक्टरका चालकको मृत्यु भएको जिल्ला प्रहरी कार्यालय बागलुङका सूचना अधिकारी प्रहरी नायव उपरिक्षक इन्द्रबहादुर रानाले बताए।  

पूर्वी रुकुमबाट बुर्तिबाङतर्फ आउँदै गर्दा भएको दुर्घटनामा मृत्यु हुनेमा चालक पूर्वी रुकुम उत्तरगंगा गाउँपालिका-१३ का २४ वर्षीय सुरेन्द्र गुरुङ रहेका छन्। 

लोकमार्गमा ट्याक्टर अनियन्त्रित भई दुर्घटना हुँदा सहचालक प्रचण्ड शेरचन सामान्य घाईते भएका छन्। घाईतेको स्थानीय मेडिकलमा उपचार भैरहेको बताईएको छ।