बाणगंगा ९ भलवाडमा गठबन्धनका उम्मेद्धारको उत्साह जनक घरदैलो

कपिलवस्तु, १९ वैशाख । कपिलवस्तुको बाणगंगा नगरपालिका वडा नम्बर ९ भलवाडमा वडा अध्यक्ष पदका लागि चारदलीय गठबन्धनका उम्मेद्धार सहित चार जनाको चुनावी प्रतिश्पर्धा छ ।

नेपाली कांग्रेस, नेकपा एमाले, चार दलीय गठबन्धनबाट उम्मेद्धारहरु जनताको घर घरमा मतभार आफ्नो पक्षमा पर्न अहिले अभियानमा सक्रिय छन् ।

वडा नम्बर ९ मा स्वतन्त्र उम्मेद्धारी दिई चारदलीय गठबन्धनको साझा उम्मेद्धारमा रहनुभएका कुमार मधु बेल्वासे सहित उहाँको सिगो प्यानल चुनवाी अभियानका साथ घर घरमा पुगि जनताका बिचमा आफ्नो पक्षमा मत मागिरहेका छन् ।

वडा अध्यक्षका उम्मेद्धार बेल्वासे सहित वडा सदस्यका उम्मेद्धारहरु कुन्तमणी भुषाल, यदुराम शर्मा, महिला वडा सदस्य राधा खनाल र दलित महिला वडा सदस्यका उम्मेद्धार टेकमाया दर्जीले वडा नम्बर ९ का टोल टोलमा पुगेर जनताका बिचमा आफ्नो उम्मेद्धारी र एजेण्डाबारे प्रचारप्रसारमा सक्रिय बनेका हुन ।

वडा अध्यक्षका उम्मेद्धार कुमार मधु बेल्वासेले ठूला दलको भडकिलो प्रचार भन्दा सामान्य शैलिको प्रचार शैली बढी प्रभावकारी बन्ने बताउनुभयो । उहाँले आफ्नो जित निश्चित रहेको समेत दाबी गर्नुभएको छ ।

पहिलो पटक आफु निर्वाचनमा उम्मेद्धार भएको २०४६ सालको घटना स्मरण गर्दै उहाँले भन्नुभयो, पहिलो पटक चुनाव लड्दा म एक्लै चुनाव प्रचारमा हिडेको थिए । त्यसैले भिड देखेर उनीहरुले नै जिते भन्नु मुर्खता हो ।

चारदलीय गठबन्धनबाट साझा उम्मेद्धार बन्नुभएका बेल्वासेले गोलाकार भित्रको हसिया हथौडा चुनाव चिन्ह लिएर वडा नम्बर ९ को वडा अध्यक्षमा उम्मेद्धारी दिनुभएको हो ।
अहिले वडाका हरेक नागरिकहरुलाई वास्तविक्ता बुझाउने बेला आएको भन्दै उहाँले आफु र आफ्नो प्यानल मोटो रकम खर्च गरेर चुनाव प्रचार गर्न भन्दा सामान्य किसिमले पनि निर्वाचनमा उम्द्धार बन्न सकिन्छ भन्ने सन्देश दिन पनि यो निर्वाचनमा सक्रिय बनेको बताउनुभयो ।

भलवाडमा चार दलीय गठबन्धनको पक्षमा मत बढी आउने देखेपछि अहिले दुई ठूला दलका उम्मेद्धारहरु अत्तालिन लागेको समेत उहाँको भनाइ छ । आफुहरुको जित हुने र त्यसको नतिजा बैशाख ३० पछि छर्लङ्ग हुने उहाँले बताउनुभयो ।

बाणगंगामा चार दलीय गठबन्धनमा नेकपा माओवादी केन्द्र, जनता समाजावदी पार्टी, नेकपा एकिकृत समाजवादी पार्टी र राष्ट्रिय जनमोर्चा बिच तालमेल छ । वडा नम्बर ९ मा भने राष्ट्रिय जनमोर्चाका उम्मेद्धारले छुट्टै उम्मेद्धारी दिएका कारण यहाँ तीन दलको तालमेलमा उम्मेद्धारहरु चुनावी मैदानमा छन् ।