आज प्रदेश–१, मधेस, वाग्मती र गण्डकीमा पानी पर्ने सम्भावना

जेठ २१,
काठमाण्डौ – अहिले प्रदेश–१. मधेस प्रदेश र वाग्मती प्रदेशको एक÷दुई ठाउँमा पानी परिरहेको छ । प्रदेश–१ को पहाडी भू–भाग र वाग्मती प्रदेशको पूर्वी भू–भागमा हल्कादेखि मध्यमखालको वर्षा भइरहेको मौसमविद् गङ्गा नगरकोटीले जानकारी दिनुभयो । उहाँका अनुसार अन्य प्रदेशमा भने मौसम सामान्यतया सफा रहेको छ ।
आज दिउँसो पनि प्रदेश–१, मधेस, वाग्मती र गण्डकी प्रदेशको केही ठाउँमा मेघगर्जन÷चट्याङ्ग र हावाहुरीसहित हल्कादेखि मध्यम वर्षाको सम्भावना रहेको छ । केही दिनको मौसम यस्तै रहने भएकाले आवश्यक सतर्कता अपनाउन मौसमविद्को आग्रह छ । अहिले नेपालमा स्थानीय वायु र भारतको उत्तर प्रदेशदेखि पूर्वी बङ्गलादेशसम्म पूर्व–पश्चिम फैलिएको न्यून चापीय रेखाको प्रभाव रहेको छ ।