गठबन्धन १० बर्ष कायम राख्ने उद्घोष : नेकपा एसले ४० सीट जित्ने दावि

काठमाडौ २६ भदौ । नेपाल कम्युनिष्ट पाटी एकीकृत समाजवादीका उप महासचिव डा। विजय पौडेलले अगामी मंसिर ४ को आम निर्वाचनबाट पार्टी सरकारमा किङ मेकरको रुपमा स्थापित हुने दाबी गरेका छन् । पाल्पाको तानसेन नगरपालिका र बगनासकाली गाउँपालिकाका पार्टी कार्यकर्ता प्रशिक्षण कार्यक्रममा बोल्दै पाटी उपमहासचिव डा। पौडेलले आगामी निर्वाचनमा पाटीले ४० सिट सम्म ल्याउने अवस्था रहेको बताए । समाजवादीको सहयोग विना सरकार बन्ने अवस्था नहुने भएकोले पाटी किङ मेकरको रुपमा स्थापित हुने आधारहरू रहेको उपमहासचिव पौडेलको भनाइ छ ।शनिबार बेलुका अबेरसम्म भएको प्रशिक्षण कार्यक्रममा उपमहासचिव पौडेलले गठवन्धनको सरकारलाई नेपाली कृषकको उत्पादन सरकारले खरिद गर्ने गरी बाध्य बनाउने नीति पार्टीले लिएको उल्लेख गरे ।एमाले पार्टी अध्यक्ष केपी ओलीले केशरजंग रायमाझीको धारमा पार्टीको गतिविधि संचालन गरी नेपालका कम्युनिष्टलाई धरासायी बनाउने अभियानमा सक्रिय भएकोले एमालेबाट विद्रोह गरिएको पौडेलले बताए ।
कार्यक्रममा एकीकृत समाजवादी लुम्बिनी प्रदेश अध्यक्ष एव पार्टीका आर्थिक विभाग प्रमुख सोमप्रसाद पाण्डेले अहिलेको गठबन्धन अझै १० बर्षसम्म कायम रहने बताए । गठबन्धन नभएको भए अहिले देशमा ओलीको निरंकुश शासन संचालन हुने, संविधान च्यातिने अवस्था रहेको उनले उल्लेख गरे । पाण्डेले प्रत्यक्षतर्फ समाजवादीले २५ सिट पाउने, समानुपातिक १५ सिट सम्म ल्याउने गरी तयारी भईरहेको र आगामी निर्वाचनपछि समाजवादीको प्रतिनिधिसभामा कम्तीमा ४० सिट कायम रहने दावी गरे । केन्द्रमा गठबन्धन विच २०७४ सालमा प्रत्यक्षतर्फ जनु पाटीले जितेको छ त्यही अनुसार सिटबाडको मोडालिटी भएकोले पाल्पा क्षेत्र नंं २ मा समाजवादीको टिकट पक्का जस्तै भएको अध्यक्ष पाण्डेले बताए ।