कपिलवस्तु, २० असोज ।
पब्लिक क्याम्पस संघ लुम्बिनी प्रदेशलाई अगाडि बढाउन प्रदेश सरकार तयार रहेको मुख्य मन्त्री डिल्ली बहादुर चौधरीले बताउनु भएको छ । क्याम्पसहरूको अवधारणा स्पष्ट हुनु पर्छ , शिक्षाको गुणस्तर कस्तो बनाउने , विद्यार्थी कस्तो उत्पादन गर्ने भन्ने विषयमा प्राध्यापकहरूको विशेष योजना हुनु पर्छ , सरकार लगानी गर्न कन्जुस्याईँ गर्दैन मुख्य मन्त्री चौधरीले प्रष्ट्याउनु भयो । क्याम्पसका प्राध्यापकहरू गुणस्तरीय शिक्षाका लागि लाग्नु पर्नेमा उहाँले जोड दिनु भयो । पब्लिक क्याम्पस संघ लुम्बिनी प्रदेशको तेस्रो अधिवेशन समारोहको शनिवार सिद्धार्थ क्याम्पस वाणगङ्गा कपिलवस्तुमा समुद्घाटन गर्दै मुख्य मन्त्री चौधरीले यस्तो बताउनु भएको हो ।
कार्यक्रममा बोल्दै सांसद विष्णु पन्थीले अबको शिक्षा परिमार्जन गर्न आवश्यकता रहेको बताउनु भयो । नेपालमै विद्यार्थीलाई टिकाउने खालको वैज्ञानिक शिक्षा अहिलेको आवश्यकता भएको औँल्याउनु भयो ।
संघका लुम्बिनी प्रदेश अध्यक्ष कृष्ण प्रसाद खनालको अध्यक्षता , संघका निर्वतमान कोषाध्यक्ष रबि बहादुर काफ्लेको स्वागत एवं यदुलाल पन्तको सञ्चालनमा भएको कार्यक्रममा संघका केन्द्रीय अध्यक्ष शत्रुधन प्रसाद गुप्ता , लुम्बिनी प्राविधिक विश्वविद्यालयका उपकुलपति डा. विनोद प्रसाद ढकाल , वाणगङ्गा नगरपालिकाका मेयर चक्रपाणी अर्याल , नेकपा एमालेका जिल्ला अध्यक्ष एवं सिद्धार्थ क्याम्पस सञ्चालक समिति अध्यक्ष डम्बर शर्मा , संघका केन्द्रीय सदस्य माया घिमिरे लगायतले सुझाव सहित शुभकामना मन्तव्य राख्नु भएको थियो ।
प्रतिक्रिया