पाँचसय छाडा पशुचौपया व्यवस्थापन गरेको बाणगंगाको दावी

कपिलवस्तु, ०४ पौष । कपिलवस्तु जिल्लाको बाणगंगा नगरपालिकाले छाडा पशुचौपया व्यवस्थापनमा अग्रसरता देखाएको छ । नगरभित्र हरेका छाडा पशुचौपयालाई तारबारसहित नगरका बिभिन्न ठाउँमा राख्न सुरु गर्दै नगरपालिकाले अग्रसरता देखाएको हो । नगरको यो अग्रसरतासंगै अहिले बाणगंगा नगरपालिकाको प्रशंसा समेत हुन थालेको छ ।छाडा पशुचौपाया ब्यवस्थापन तथा नियन्त्रण समितिका संयोजक समेत रहेका नगरका प्रवक्ता बिष्णु पौडेलले बाणगंगा नगरपालिका– २ मा अवस्थित बैजलपुर सामुदायिक बनमा २ सय, नन्दनगरमा १ सय गाईवस्तु राखेको जानकारी दिए ।

उनका अनुसार भलवाडमा १ सय, खारखानीमा ५० गाईवस्तु राखिएको छ भने लक्ष्मणघाटमा वडाध्यक्ष करुण टण्डनको नेतृत्वमा ४० बढी पशुचौपयाको व्यवस्थापन गरिएको छ ।उनले अब नगरलाई छाडापशुचौपया मुक्त नगरपालिका बनाउने दिशातर्फ आफुहरु अग्रसर रहेको बताए । दीर्घकालीन रुपमै समस्याको समाधान गर्न नगरपालिका लागी परेको उनको बताउनुभयो ।नगरप्रमुख चक्रपाणी अर्यालले माघसम्म ठोस नतिजा आउने गरी काम हुने बताए । छाडा पशुचौपयाले सिर्जना भएका विविध समस्याप्रति नगर विगतदेखि नै चिन्तित रहेको बताउँदै उनले दीर्घकालीन समाधान गरिने दाबी गरे ।