राष्ट्रिय समाचार समिति (रासस)
झापा, ६ वैशाखः
मेचीनगर नगरपालिका र मेची उद्योग वाणिज्य सङ्घले सार्वजनिक निजी साझेदारी (पिपीपी) कार्यक्रमअन्तर्गत मेचीनगर–१३ चारआलीमा आधुनिक तरकारी बजार (मण्डी) निर्माण सुरु गरेका छन् । स्थानीय व्यवसायीले वर्षौदेखि माग गर्दै आएको मण्डी निर्माणका लागि नगरपालिका र सङ्घबीच आज सम्झौता भएको हो । सम्झौतापत्रमा नगरप्रमुख गोपालचन्द्र बुढाथोकी र मेची उद्योग वाणिज्य सङ्घका अध्यक्ष खेमराज प्रसाईँले हस्ताक्षर गर्नुभएको छ । चारआली चोकदेखि ५० मिटर दक्षिणको आइतबारे हटियाको १६ कट्ठा १४ धुर जग्गामा मण्डीको निर्माण सुरु गरिएको सङ्घका अध्यक्ष प्रसाईँले बताउनुभयो । मण्डीमा २५ वटा कोठा रहने जनाइएको छ । सम्झौतामा सार्वजनिक–निजी साझेदारी कार्यक्रमअन्तर्गत मण्डीको निर्माण र सञ्चालन गरिने उल्लेख छ । सङ्घले सब्जीमण्डीको टहरा र पार्किङ निर्माण, सञ्चालन तथा व्यवस्थापन गर्न वार्षिक रु छ लाख ३५ हजार लगानी गर्नेछ भने मेचीनगर नगरपालिकाले नगरपालिकाले आवश्यक बजेटको व्यवस्था गरेर जग्गा सम्याउने, कल्भर्ट बनाउने, विद्युत् र खानेपानी सुविधा पुर्याउने र सिसी क्यामेरा जडान गर्ने भएको छ ।
प्रतिक्रिया