महिला राष्ट्रिय कबड्डीको उपाधि सशस्त्र प्रहरीलाई

इनरुवा (सुनसरी), २९ वैशाख ः प्रथम कोशीटप्पु खुला महिला राष्ट्रिय कबड्डीको उपाधि सशस्त्र प्रहरीले हात पारेको छ । इनरुवा–२ स्थित शिक्षा खेल मैदानमा सम्पन्न फाइनलमा नेपाल प्रहरीलाई १७–२० अङ्कले पराजित गर्दै सशस्त्र प्रहरीले उपाधि चुमेको जिल्ला खेलकुद क्लब सुनसरीका अध्यक्ष तरुणकुमार यादवले जानकारी दिनुभयो । प्रतियोगितामा कोसी प्रदेश र त्रिभुवन आर्मी तेस्रो भएको आयोजकले जनाएको छ । प्रतियोगितामा पहिलो हुनेले रु एक लाख र ट्रफी, दोस्रो हुनेले रु ५० हजार र ट्रफी र तेस्रो हुने दुई वटा टिमलाई रु २५÷२५ हजार, ट्रफी, पदक प्रमाणपत्र प्रदान गरियो । विजेता टिमलाई कोसी प्रदेश, उद्योग कृषि तथा सहकारी मन्त्री इस्राइल मंसुरीले पुरस्कार वितरण गर्नुभयो ।