लुम्बिनी प्रदेशमा उपसचिव तहका कर्मचारीको सरुवा :बाणगंगादेखि बर्दघाटसम्म प्रमुख प्रशासकीय अधिकृत फेरिए

पार्वती पाण्डे कपिलवस्तु २७ भदौ ।संघीय मामिला तथा सामान्य प्रशासन मन्त्रालयले लुम्बिनी प्रदेशका विभिन्न स्थानीय तहसहित देशभरका उपसचिव तहका कर्मचारीको सरुवा तथा कामकाजको जिम्मेवारी हेरफेर गरेको छ । मन्त्रालयको भदौ २६ गतेको निर्णयअनुसार लुम्बिनी प्रदेशका कपिलवस्तु, रूपन्देही र पश्चिम नवलपरासीका स्थानीय तहमा पनि प्रमुख प्रशासकीय अधिकृतको जिम्मेवारी परिवर्तन गरिएको हो ।
कपिलवस्तुको बाणगंगा नगरपालिकाका प्रमुख प्रशासकीय अधिकृत भक्तिराम मरासिनी गृह मन्त्रालय वा अन्तर्गत खटिनुभएको छ । उहाँको स्थानमा राष्ट्रपतिको कार्यालयमा कार्यरत उपसचिव ईश्वरी प्रसाद पाण्डेलाई बाणगंगामा कामकाजका लागि खटाइएको छ ।
त्यस्तै, कृष्णनगर नगरपालिकाका प्रमुख प्रशासकीय अधिकृत खेमराज देवकोटालाई पश्चिम नवलपरासीको रामग्राम नगरपालिकामा कामकाजका लागि खटाइएको छ ।
रूपन्देहीको सैनामैना नगरपालिकाका प्रमुख प्रशासकीय अधिकृत तुलसीराम मरासिनी राष्ट्रिय योजना आयोगको सचिवालय, काठमाडौंमा जानुभएको छ । उहाँको स्थानमा बागलुङको ढोरपाटन नगरपालिकाका प्रमुख प्रशासकीय अधिकृत चिरञ्जीवी घिमिरेलाई सैनामैनामा खटाइएको छ ।
यस्तै, तिलोत्तमा नगरपालिकाका प्रमुख प्रशासकीय अधिकृत खुमलाल भुसाल संस्कृति, पर्यटन तथा नागरिक उड्डयन मन्त्रालय वा अन्तर्गत खटिनुभएको छ । उहाँको स्थानमा पश्चिम नवलपरासीको बर्दघाट नगरपालिकाका प्रमुख प्रशासकीय अधिकृत बाबुराम पौडेललाई तिलोत्तमामा कामकाजका लागि पठाइएको छ ।
पश्चिम नवलपरासीमै सुनवल नगरपालिकाका प्रमुख प्रशासकीय अधिकृत शेषकान्त पौडेललाई गृह मन्त्रालय वा अन्तर्गत खटाइएको छ । त्यस्तै, रामग्राम नगरपालिकाका प्रमुख प्रशासकीय अधिकृत भूपेन्द्र पाण्डेय राष्ट्रिय योजना आयोगको सचिवालयमा खटिनुभएको छ ।
यससँगै लुम्बिनी प्रदेशका बाणगंगा, सैनामैना, तिलोत्तमा, कृष्णनगर, रामग्राम, बर्दघाट र सुनवललगायत स्थानीय तहमा प्रमुख प्रशासकीय अधिकृतहरूको जिम्मेवारीमा हेरफेर भएको छ ।
मन्त्रालयको निर्णयअनुसार सरुवा तथा कामकाजमा खटाइएका कर्मचारीलाई सम्बन्धित स्थानीय तह र निकायमा जिम्मेवारी सम्हाल्न पठाइएको हो ।