गोरखा, २० असार । गोरखा अस्पतालमा शुक्रबार राती एकजना कोरोना संक्रमितको मृत्यु भएको छ। योसँगै नेपालमा कोरोना भाइरस (कोभिड–१९) बाट ज्यान गुमाउने संक्रमितको संख्या ३३ पुगेको छ। अस्पतालको आइसोलेसन कक्षमा भर्ना भएका पालुङटार नगरपालिका–७ का ४४ वर्षीय पुरुषको शनिबार बिहान पाँच बजे मृत्यु भएको अस्पतालले जनाएको छ ।
विज्ञप्तिमा ती व्यक्ति दीर्घरोगी रहेको र कोरोना संक्रमणसँगै निमोनियाबाट ग्रसित रहेको अस्पतालका निमित्त मेडिकल सुपरिटेण्डेन्ट डा. नविन थापाद्वारा हस्ताक्षरित विज्ञप्तिमा उल्लेख छ । मृतक पुरुष असार १६ गते कतारबाट नेपाल फर्किएर १७ गतेदेखि पालुङटारस्थित जिवनज्योती माविको क्वारेन्टिनमा बसेका थिए।
शुक्रवार राती करिब १० बजे उनलाई कोरोना संक्रमण पुष्टि भएपछि थप उपचारका लागि गोरखा अस्पताल ल्याइएको थियो। उनी क्वारेन्टिनमा बसेकाले अन्य ब्यक्तीमा उनीबाट संक्रमण नफैलिएको हुँदा नआत्तिन र सचेत हुन पालुङटार नगरपालिकाले अनुरोध गरेको छ। नेपालमा १५ हजार २५९ जना कोरोना संक्रमित पुष्टि भएको छ भने ६ हजार १४३ जनाले कोरोना भाइरस जिति सकेका छन् ।
प्रतिक्रिया