बुटवल २९ असार । सर्वोच्च अदालतले प्रधानमन्त्रीद्वारा विघटित प्रतिनिधि सभा पुनस्थापना गर्ने आदेश जारी गरेसँगै लुम्बिनी प्रदेशका मुख्यमन्त्री शंकर पोखरेलले असन्तुष्टि जनाउनु भएको छ । सामाजिक सञ्जालमा छोटो प्रतिक्रिया दिदैं उहाले अदालतको आदेशले संसदीय व्यवस्था र दलीय प्रणालीमाथि गम्भीर आघात पुग्ने बताउनु भएको छ ।
आदेशले ‘सुदुर भविष्यसम्म नेपाल राष्ट्र र नेपाली जनताले अस्थिरताको दुष्चक्र वेहोर्नु पर्ने’ दावी उहाले गर्नु भएको छ । पोखरेलले लेख्नु भएको छ -‘संसदीय व्यवस्था र दलीय प्रणालीमाथि गम्भीर आघात, सुदूर भविष्यसम्म नेपाल राष्ट्र र नेपालीजनले अस्थिरताको दुष्चक्र बेहोर्नु पर्नेभो ।’ यता सर्वोच्च अदालतले प्रतिनिधिसभा पुनस्र्थापना र शेरबाहदुर देउवालाई प्रधानमन्त्री बनाउने फैसला गरेपछि प्रधानमन्त्री केपी शर्मा ओली समर्थित युवा संघले बुटवलमा विरोध प्रदर्शन गरेको छ ।
सोमबार फैसला आएको केहीबेरमा नेकपा(एमाले)का नेता महेश बस्नेतले देशभरबाट आन्दोलनका लागि उठ्न आह्वान गरेका थिए । उनले फेसबुकमार्फत् तुरून्तै भेला भएर प्रदर्शन गर्न निर्देशन दिएका थिए । त्यसको केहीबेरमा कार्यकर्ताहरू काठमाडौं लगायत देशका केही स्थानमा विरोध प्रदर्शन गरेका छन् । बुटवलको राजमार्ग चौराहमा भेलाभएका केही कार्यकर्ताहरुले ‘गैर संवैधानिक परमादेश खारेज गर’ भन्दै प्रदर्शमा उत्रिएका थिए । प्रहरीले त्यसैअनुसार प्रहरी समेत परिचालन गरेको थियो ।
प्रतिक्रिया