इन्धन बोकेको ट्याङ्कर लरीसँग ठोक्किँदा कम्तीमा ८४ जनाको ज्यान गयो

काठमाण्डौ, २० कार्तिक । सियरा लिओनमा एउटा इन्धन बोकेको ट्याङ्कर अर्को लरीसँग ठोक्किँदा कम्तीमा ८४ जनाको ज्यान गएको छ । राजधानी फ्रीटाउनमा दुई गाडी जुधेर विस्फोट हुँदा कम्तीमा ८४ जनाको ज्यान गएको बीबीसीले जनाएको छ । फ्रीटाउनका मेयर वाइभोन अकि सवेरले एक सयभन्दा धेरैको ज्यान गएको बताउनुभएको छ । दुर्घटनामा झन्डै एक सय जना घाइतेको उपचार भइरहेको पनि उहाँले बताउनुभयो । 

भुइँमा पोखिएको इन्धनमा आगो लागेपछि नजिक रहेका मानिसहरू र सवारी साधनमा सल्किँदा धेरैको ज्यान गएको हो ।  राष्ट्रपति जुलियस मादा बायोले यसलाई दुःखद घटना भएको भन्दै पीडित परिवारलाई आफूले सक्दो सहयोग गर्ने बताउनुभएको छ ।

गएको मार्चमा पनि त्यही सहरको एउटा बस्तीमा आगलागी हुँदा ८० जनाभन्दा बढी व्यक्ति घाइते भएका थिए । त्यस्तै सन् २०१७ मा भारी वर्षापछि आएको बाढीमा परेर एक हजारभन्दा धेरैको ज्यान गएको थियो ।