तुलसीपुरको १ जुत्ता चप्पल गोदाममा भीषण आगोलागी , निकालियो २ जनाको शव

तुलसीपुर,
२८-माघ/ तुलसीपुरको जुत्ता चप्पलको गोदाममा मध्यरातमा लागेको आगो अझै नियन्त्रणमा आउन सकेको छैन । गएराती २ बजेदेखि लागेको आगो अझै नियन्त्रणमा आउन नसकेको इलाका प्रहरी कार्यालय तुलसीपुरका प्रमुख डिएसपी श्यामु अर्यालले जानकारी दिए ।

तुलसीपुर उपमहानगरपालिका- ५ ‘ङ’ लाईनस्थित ‘इरम फुटवेयर’ जुत्ता चप्पल गोदाम रहेको चार तले घरमा भएको आगलागीमा परी पाँचजना घर भित्रै फसेको प्रहरीले बताएको छ । ति मध्ये प्रहरीले अहिले दुई जनाको शव निकालेको पत्रकार शरद रेग्मीले जानकारी दिए ।

‘घर भित्र तीनदेखि पाँच जनासम्म मानिस फसेको हुनसक्ने आशंका स्थानीयले गरेका छन् । तर आगो र धुँवाको राले भित्र जान समस्या भएको बताईएको छ । दुई बजेतिर गस्तीको प्रहरीले आगो लागेको देखेको थियो । घर धनी काठमाडौंमा बस्ने हुँदा उक्त गोदाम कसको हो भन्ने कुरा पनि अहिलेसम्म नखुलेको डिएसपी अर्यायलले जानकारी दिए ।

अहिले इलाका प्रहरी कार्यालय तुलसीपुर, नेपाली सेना, सशस्त्र प्रहरी, स्थानीय तथा तुलसीपुर र घोराही उपमहानगरपालिकाको दमकलले आगो नियन्त्रणमा लिन प्रयास गरिरहेका छन् । विद्युत मिटर पड्किदा आगलागी भएको प्रहरीले आशंका गरेको छ ।