अदालतवाट जन्मिएको सरकार अदालत ध्वस्त पार्न अग्रसर : पौडेल

रुपन्देही १ चैत्र । नेकपा एमालेका केन्द्रिय उपाध्यक्ष एवम पूर्व अर्थमन्त्री विष्णु पौडेलले अदालतवाट जन्मिएको वर्तमान सरकार अदालत ध्वस्त पार्न अग्रसर भएको आरोप लगाउनु भएको छ । उहाले महाअभियोग पास हुने संख्या सत्ता गठबन्धनसंग छ भने पास होला भन्दै एमाले संसदीय प्रकृयामा सामेल नै नभएकोले महाअभियोगमा कसरी सामेल हुन्छ भन्ने प्रश्न गर्नु भयो ।
उहाले प्रचण्ड र माधव कुमार नेपाल कम्युनिष्ट आन्दोलनको मुख्य खलनायक भएको आरोप लगाउनुभएको छ । सोमबार नेकपा एमाले बुटवल उपमहानगर कमिटिले आयोजना गरेको स्थानीय तह निर्वाचन केन्द्रित प्रशिक्षण तथा अभिमुखीकरण कार्यक्रममा बोल्दै उपाध्यक्ष पौडेलले नेपालको कम्युनिष्ट आन्दोलनलाई कमजोर बनाउन अदालतलाई समेत दुरुपयोग गरेको आरोप लगाउनुभयो ।
उपाध्यक्ष पौडेलले नेकपा एमालेलाई फुटाउन देशी विदेशी प्रतिगामी शक्तिहरु लागेको बताउदै प्रचण्ड र माधव कुमार नेपाल प्रतिगामी शक्तिहरुको मतियार बनेको जिकिर गर्नुभयो । उहाँले वामपन्थी शक्तिको सरकार गिराएर कांग्रेसको पछि लागेका प्रचण्ड र माधव कुमार नेपालले नेपालको कम्त्युनिष्ट आन्दोलनमा धेरै ठूलो अपराध गरेको बताउनुभयो ।
जनताले उनीहरुलाई माफी दिन नसक्ने बताउँदै नेता पौडेलले नेपाली कम्युनिष्ट आन्दोलनलाई धोका दिनेहरु समाप्त भएर जाने ठोकुवा गर्नु भयो । उपाध्यक्ष पौडेलले नेकपा एमालेले देश र नेपाली जनताको सम्बृद्धि विकास चाहेको उल्लेख गर्दै जनताले आगामी चुनावमा प्रतिफल दिने बताउनुभयो ।पूर्व उपप्रधान तथा अर्थमन्त्री पौडेलले प्रतिगामी शक्तिहरुका मतियारहरुले अदालतबाट सरकार गठन गरेर अदालतकै धज्जी उडाएको बताउदै यसमा मुख्य दोष प्रचण्ड माधवको नै रहेको दावी गर्नुभयो ।