यौन दुरब्यवहारमा शिक्षक पक्राउ,बलात्कार आरोपी हिरासतवाट फरार

दाङ ११ साउन ।दाङमा विद्यार्थीलाई यौन दुर्व्यवहार गरेको आरोपमा एक जना शिक्षक पक्राउ परेका छन् । राप्ती गाउँपालिका–५ स्थित स्टार समिट बोडिङ स्कुलमा कार्यरत ५० वर्षीय शिक्षक श्यामलाल चौधरीलाई सोही विद्यालयमा अध्ययनरत पाँच वर्षीया छात्रालाई दुर्व्यवहार गरेको आरोपमा पक्राउ गरिएको जिल्ला प्रहरी प्रमुख एसपी सुरेशप्रसाद काफ्लले बताए । उनका अनुसार बालिकाले नुहाउने क्रममा बताएपछि शिक्षकले दुर्व्यवहार गरेको घटना बाहिर आएको हो । सोमबार पीडित परिवारले दिएको किटानी जाहेरीका आधारमा शिक्षक चौधरीलाई नियन्त्रणमा लिइएको छ । घटनामाथि थप अनुसन्धान भइरहेको प्रहरीले बताएको छ ।
यता बलात्कारको अभियोगमा हिरासतमा रहेका बर्दियाका थुनुवा इलाका प्रहरी कार्यालय, बाँसगढीबाट सोमबार दिउँसो फरार भएका छन् । प्रहरीले उनी फरार भएको जानकारी मंगलबार मात्र दिएको हो । गत असार २३ गते पक्राउ परेका बाँके खजुरा गाउँपालिका घर भएका अब्दुल खा‘ सोमबार दिउँसो खाना खाएर प्रहरी कार्यालयबाट फरार भएको प्रहरी प्रवक्ता एवं प्रहरी नायब उपरीक्षक सूर्य सुवेदीले बताए । बलात्कारका अभियोगीलाई बाँकेबाट पक्राउ गरी जबर्जस्ती करणी मुद्दामा कारबाही चलाइएको थियो । जिल्ला अदालत बर्दियामा पुनः म्याद थप गर्न ल्याउने समय प्रहरीलाई झुक्याएर फरार भएको प्रहरी नायब उपरीक्षक सुवेदीले बताए । स्थानीयले प्रहरीको लापरबाहीले थुनुवा भागेको आरोप लगाएका छन् । प्रहरी नायब उपरीक्षक सुवेदीले फरार अभियोगीको खोजी कार्य तीव्र पारिएको जनाएका छन् ।