भालुवाङ देखि धानखोला बीचको सडक यथासिघ्र मर्मत गर्न ध्यानाकर्षण

दाङ ११ फागुन । राप्ती गाउँपालिकाले भालुवाङ देखि सिंगे खोला सम्मको सडक यथाशिघ्र मर्मत गर्न सडक डिभिजन कार्यालय दाङलाई आग्रह गरेको छ ।गाउँपालिकाका अध्यक्ष प्रकाश विष्टले बिहीबार सडक डिभिजन कार्यालय दाङलाई ध्यानाकर्षण पत्र लेख्दै सो आग्रह गरेका हुन् । राप्ती गाउँपालिका वडा नम्बर १ भालुवाङ देखि वडा नम्बर ५ सिंगेखोला सम्मको झण्डै १५ किलो मिटर पूर्व पश्चिम राजमार्ग (साविक महेन्द्र राजमार्ग) को विभिन्न ठाउँमा खाल्डखुल्डी भई दैनिक जसो दुर्घटनाहरु भइरहेको अध्यक्ष विष्टले जारी गरेको पत्रमा उल्लेख छ ।
राप्ती गाउँपालिका लुम्बिनी प्रदेशको राजधानी समेत भएकोले राप्ती गाउँपालिका क्षेत्र भित्रका राजमार्गमा परेका खाल्डाखुल्डी मर्मत सम्भारलाई प्राथमिकता दिई गर्नुपर्नेमा त्यस कार्यालयले उक्त कार्य समेत नगरेको र पूर्व पश्चिम राजमार्गको सडक लेन, लाइनिङ र जेव्रा क्रसिङ राख्नुपर्नेमा सो कार्य समेत नगरेको प्रति अध्यक्ष विष्टले दुख प्रकट गरेका छन् ।पटक(पटक फोन सम्पर्क गरी विषयवस्तुको अवगत गराउँदा समेत चासो नदेखाएकोले जिल्ला प्रशासन कार्यालय दाङलाई समेत उक्त पत्रको बोधार्थ पठाइएको छ ।