काठमाण्डौं, ०२ चैत्र ।
विस्फोटक ब्याटिङ गरेका युएईका कप्तान मोहम्मद वसिमको विकेट लिएसँगै नेपाल खेलमा फर्किएको छ । युएईले चौथो विकेट पनि गुमाएको छ । दीपेन्द्रसिंह ऐरीले नेपाललाई चौथो सफलता दिलाए । उनले ११ बलमा तीन रन बनाएका आयन अफ्जल खानलाई गुल्सन झाको हातबाट आउट गराए ।
सुदृढ सुरुवात गरे पनि कप्तान मोहम्मद वसिमलाई गुमाएपछि युएई संकटमा देखिएको छ । टिमको स्कोर ९८ हुँदा दोस्रो विकेटका रूपमा वसिम आउट भएका थिए ।
कीर्तिपुरस्थित त्रिवि खेलमैदानमा छक्काको वर्षा गरिरहेका वसिमलाई सन्दीपले पेभेलियन पठाएका हुन् । वसिमले ४९ बलमा ६३ रन बनाए । यसक्रममा उनले ६ छक्का र दुई चौका प्रहार गरे ।
त्यसपछि थप २० रन जोड्दा युएईले तेस्रो विकेटका रूपमा चुन्दनगपोयिल रिजवान सात रनमा गुमायो । भीम सार्कीले फालेको थ्रोमा विकेटकिपर आसिफ सेखले स्टम्प उडाए । ताजाअवस्थामा युएईले २८ ओभरमा चार विकेट गुमाएर एक सय २९ रन बनाएको छ ।
प्रतिक्रिया