कृषकलाई धान नकाट्न मौसमविद्हरुको आग्रह

काठमाडौँ। जल तथा मौसम विज्ञान विभागका मौसमविद्हरूले भारी वर्षा हुने सम्भावना रहेकाले तत्काल धान काट्न बाँकी रहेका किसानहरूलाई मौसमको अवस्था हेरेर मात्र काम गर्न आग्रह गरेका छन्।
मौसमविद् सञ्जीव अधिकारीका अनुसार आज रातिदेखि भारी वर्षा हुने सम्भावना रहेकाले धान काटिहाल्ने अवस्था नरहेको सुझाव दिइएको छ। बुधवारदेखि सुरु भएको यो वर्षा कात्तिक १५ गते शनिबारसम्म रहने विभागले जनाएको छ।
कृषकहरूलाई सम्भावित क्षतिबाट जोगिनका लागि सतर्कता अपनाउन र धान नकाटी सुरक्षित रहन अनुरोध गरिएको छ।
दिनभर मध्यम वर्षा भइरहेपछि आज रातिदेखि भने भारी वर्षा हुने सम्भावना रहेको जल तथा मौसम विज्ञान विभागले जनाएको छ। मौसमविद् अधिकारीले आज रातिबाट भने भारी वर्षा हुने सम्भावना रहेको बताए।
उनका अनुसार आज दिनभर बागमती, कोशी, मधेस प्रदेशलगायत क्षेत्रमा मध्यम वर्षा भएको छ भने गण्डकी र लुम्बिनी प्रदेशमा स्थान विशेष फाट्टफुट्ट पानी परेको छ। यसैगरी, गण्डकी र बागमती प्रदेशका उच्च हिमाली भेगमा हिमपातसहितको वर्षा भएको छ।