हरिबोधिनी एकादशीको अवसरमा अध्यक्ष तिवारीद्वारा शुभकामना सन्देश

कपिलवस्तु, कार्तिक —१५

यशोधरा गाउँपालिकाका अध्यक्ष शिव दयाल तिवारीले हरिबोधिनी (प्रबोधिनी) एकादशीको पावन अवसरमा सम्पूर्ण भक्तजन, दाजुभाइ तथा दिदीबहिनीहरूमा हार्दिक शुभकामना व्यक्त गर्नुभएको छ।
अध्यक्ष तिवारीले शुभकामना सन्देशमा भगवान श्रीहरिविष्णुको उपासना र भक्ति साधनाको यस दिवसले सम्पूर्ण मानवजातिमा श्रद्धा, शान्ति र सद्भाव फैलाउने विश्वास व्यक्त गर्नुभयो। उहाँले भन्नुभयो, “हरिबोधिनी एकादशीको दिन भगवान हरि शयनी अवस्थाबाट जाग्रत हुने धार्मिक विश्वास रहिआएको छ। व्रत, पूजा, भजन र सत्कर्ममा संलग्न रहनु आत्मिक शुद्धता, पारिवारिक सुख, समृद्धि र आरोग्य प्राप्तिको माध्यम हो।” उहाँले यस पवित्र अवसरले गाउँ, समाज र देशमा धार्मिक एकता, आपसी सद्भाव र सामूहिक प्रगतिका लागि प्रेरणा प्रदान गरोस् भन्ने शुभकामना व्यक्त गर्नु भयो।