मुस्ताङको नरसिंह खोला नुन खानी खोंचमा थुनियो

मुस्ताङ, १७, कात्तिक

यहाँको वारागुङ मुक्तिक्षेत्र गाउँपालिका–३ स्थित नुन खानी खोंचमा पहिरो जाँदा नरसिंह खोला थुनिएको स्थानीय प्रशासनले जनाएको छ । शनिबार रातिदेखि खोला थुनिएर थुनिएको स्थान भन्दा मुनि पानी सुकेको स्थानीयले आइतवार बिहान जानकारी गराएको मुस्ताङका प्रमुख जिल्ला अधिकारी विष्णुप्रसाद भुसालले जानकारी दिनुभयो । “खोलाको पानी पुरै थुनिएको छ, अलिअलि मात्रै रसाएको देखिन्छ,” प्रजिअ भुसालले भन्नुभयो, “आज दिउँसो नेपाली सेनाको ड्रोनमार्फत थुनिएको स्थान खोजी ग¥यौँ, नुन खानी नजिक दुईतर्फी पहिरो गएर खोलाको पानी ताल बनेको पाइयो ।”

सेनाले खोला थुनिएर ताल बनेको स्थानको तत्काल विश्लेषण गर्दा भोलिसम्म ताल नभरिने र नफुट्ने जानकारी प्राप्त गरेको प्रजिअ भुसालले बताउनुभयो । सेनाको ड्रोनमार्फत लिएको तस्बीर हेर्दा खासै ठुलो ताल बनेको जस्तो नदेखिएको उहाँको भनाइ छ । खोलाको पानी सुकेसँगै खोलातर्फको सडकबाट आउजाउ गर्ने सवारी साधन नचलाउन र मानिसलाई ओहोरदोहोर नगर्न जिल्ला प्रशासनले सूचना जारी गरेको छ । वारागुङ–३ स्थित प्राचीन नुन खानी तेताङ गाउँको उत्तर÷पूर्वमा पर्छ । तेताङबाट पैदल एक घण्टा यात्रामा पुग्ने सकिने नुनखानी दुई अग्ला अग्ला विशाल पहाडको खोंचमा पर्छ । 

“थुनिएको खोलाको ताल फुटेर तल छुसाङको तटीय बस्तीमा हुने जोखिम कम भएको हामीले विश्लेषण गरेका छौँ, भोलि बिहान नुन खानीमा पुगेर थुनिएको स्थानलाई निकास दिने विकल्प खोज्छौँ,” प्रजिअ भुसालले भन्नुभयो । सो स्थान छुसाङबाट डेढ घण्टाको पैदल दुरीमा पर्छ ।