कोपवामा लघुवित्तको वित्तीय साक्षरता कार्यक्रम सम्पन्न, उत्कृष्ट बचतकर्ताहरू सम्मानित

११ मंसिर, बाणगंगा

आरम्भ चौतारी लघुवित्त वित्तीय संस्था लिमिटेड, शाखा कोपवाले विहिबार एकदिने वित्तीय साक्षरता कार्यक्रम सम्पन्न गरेको छ। वडा कार्यालय परिसरमै आयोजना गरिएको कार्यक्रममा वित्तीय अनुशासन, ऋण व्यवस्थापन र बचतको संस्कृतिबारे सहभागीहरूलाई विस्तृत जानकारी दिइएको थियो।
कार्यक्रमका प्रमुख अतिथि लुम्बिनी प्रदेशसभा सदस्य विष्णु प्रसाद पन्थीले ऋण लिँदा त्यसको सही उपयोग अनिवार्य हुने र समयमा भुक्तानी गर्नु प्रत्येक ग्राहकको दायित्व भएको उल्लेख गर्नु भयो । केही घटनाका कारण ऋण उपयोगमा चुनौती पैदा भएकाले नियमित निगरानी र जिम्मेवार व्यवहार आवश्यक रहेको चर्चा गर्नु भयो । पंथीले फजुल खर्च त्याग्दै बचत बानी विकास गर्न आग्रह गर्दै, “पैसा थिग्रामा थामिएर बस्नु हुँदैन, चलायमान अर्थतन्त्रकै आधार उद्यमशीलता हो,” भन्ने धारणा राख्नु भयो ।

बाणगंगाकी उप–मेयर रिता कुमारी चौधरीले ऋणको दुरुपयोगले व्यक्ति र संस्था दुबै समस्यामा पर्ने उल्लेख गर्नु भयो । केही सहकारीका गतिविधिले लघुवित्त क्षेत्र बदनाम भए पनि आरम्भ चौतारी लघुवित्तले ८–९ वर्षदेखि विश्वसनीय रूपमा सेवा दिइरहेको भन्दै उपप्रमुख चौधरीले संस्थाको प्रशंसा गर्नु भयो ।
वडा नं. ५ का अध्यक्ष दुनिका भुसालले ऋण परिचालन र बचत व्यवस्थापनमा संस्थाले अझ प्रभावकारी कार्यक्रम ल्याउनुपर्ने सुझाव दिनु भयो ।
कार्यक्रममा उत्कृष्ट बचत, अनुशासन र ऋण परिचालनमा उदाहरणीय भूमिका खेलेका शकुन्तला थारु, देवा खनाल, अमृता थारु, शिव अधिकारी, चिन्की थारु र दिपा थारुलाई सम्मान गरिएको थियो। प्रमुख अतिथि लगायत अन्य अतिथिलाई मायाको चिनो प्रदान गरिएको थियो।
शाखा प्रमुख माधव प्रसाद पन्थीको अध्यक्षतामा सम्पन्न कार्यक्रममा नरसिंह मिश्रले स्वागत मन्तव्य राख्नु भयो । त्यस्तै कार्यक्रमको उद्देश्यबारे प्रतिक्षा परियारले जानकारी दिएकी थिइन्। अनुगमन अधिकृत दिपा ज्ञवालीले सञ्चालन गरेको कार्यक्रममा संचारकर्मी हरि अधिकारी, कृष्ण प्रसाद पौडेल लगायतको सहभागिता रहेको आयोजकले जनाएको छ।