नागरिक–प्रहरी साझेदारीमा जोड : “नागरिकको मन जित्ने गरी काम गर्नुपर्छ” — मेयर शाह

कृष्णनगर २१ बैशाख ।कृष्णनगर नगरपालिकामा आयोजित नागरिक–प्रहरी साझेदारी अन्तर्गतको अन्तरक्रिया कार्यक्रममा सहभागीहरूले जनविश्वास अभिवृद्धि, सेवा सुधार र सहकार्य सुदृढ गर्ने विषयमा जोड दिएका छन्। कार्यक्रममा स्थानीय सरकार, प्रहरी प्रशासन र नागरिकबीच खुला संवाद भएको थियो।
कार्यक्रमलाई सम्बोधन गर्दै कृष्णनगर नगरपालिकाका मेयर रजत प्रताप शाहले प्रहरीले नागरिकको मन जित्ने गरी सेवा प्रवाह गर्नुपर्ने बताएका छन्। उनले जनताको विश्वास बिना शान्ति सुरक्षा प्रणाली प्रभावकारी हुन नसक्ने उल्लेख गर्दै प्रहरीको भूमिका अझ जिम्मेवार र उत्तरदायी हुनुपर्ने धारणा राखे। “प्रहरीले नागरिकसँग नजिकिएर, उनीहरूको भावना बुझेर काम गर्नुपर्छ। नागरिकको मन जित्न सके मात्रै सुशासन र पारदर्शिता कायम गर्न सहज हुन्छ,” मेयर शाहले भने।
उनले स्थानीय तह र प्रहरीबीचको सहकार्यलाई अझ मजबुत बनाउँदै जनमुखी सेवा प्रवाहमा ध्यान दिनुपर्ने आवश्यकता औंल्याए। जनताको अपेक्षा अनुसार काम गर्न सके मात्र विकास र शान्ति सुरक्षा दुवै सुदृढ हुने उनको भनाइ थियो।
कार्यक्रममा कृष्णनगरका प्रहरी निरीक्षक कृष्ण बहादुर कुँवरले नागरिक–प्रहरी साझेदारी कार्यक्रमको उद्देश्य नै जनतासँग प्रत्यक्ष संवाद गरी उनीहरूको गुनासा सुन्ने र व्यवहार सुधार गर्नु रहेको स्पष्ट पारे। उनले प्रहरीले जनताको विश्वास जित्नका लागि आफ्नो कार्यशैलीमा सुधार गर्दै जाने प्रतिबद्धता व्यक्त गरे। “हामी नागरिकका सुझावलाई गम्भीरतापूर्वक लिन्छौं। सेवा प्रवाहमा सुधार गर्दै जनताको नजिक पुग्ने हाम्रो प्रयास रहनेछ,” उनले बताए।
उनका अनुसार प्रहरी र नागरिकबीचको दूरी घटाउन यस्ता कार्यक्रम प्रभावकारी माध्यम बन्ने गरेका छन्। उनले शान्ति सुरक्षा कायम राख्न नागरिकको सहकार्य अपरिहार्य रहेको पनि उल्लेख गरे।
यसैगरी, कृष्णनगर नगरपालिकाका प्रमुख प्रशासकीय अधिकृत खेमराज देवकोटाले स्थानीय सरकारले प्रहरी प्रशासनलाई आवश्यक सहयोग गर्दै आएको जानकारी दिए। उनले नागरिकमैत्री सेवा प्रवाहका लागि प्रहरी अझ सक्रिय र संवेदनशील हुनुपर्नेमा जोड दिए। “स्थानीय सरकार र प्रहरीबीच सहकार्य भए मात्र सेवा प्रभावकारी हुन्छ। नागरिकको अपेक्षा अनुसार काम गर्न सबै पक्ष जिम्मेवार हुनुपर्छ,” उनले भने।
कार्यक्रममा सहभागी स्थानीयबासीहरूले पनि आफ्ना अनुभव, गुनासा र सुझाव प्रस्तुत गरेका थिए। उनीहरूले विशेषगरी शान्ति सुरक्षामा थप सुधार, सेवामा सहजता र प्रहरीको व्यवहारमा सकारात्मक परिवर्तन आवश्यक रहेको औंल्याए। केही सहभागीहरूले प्रहरीसँग सम्पर्क गर्न अझ सहज वातावरण बनाउनुपर्ने, आपतकालीन अवस्थामा छिटो प्रतिक्रिया दिनुपर्ने तथा समुदायमैत्री व्यवहारलाई प्राथमिकता दिनुपर्ने बताएका थिए।
स्थानीय एक सहभागीले भने, “प्रहरी हाम्रो सुरक्षा गर्ने निकाय हो। त्यसैले हामीसँग नजिक भएर काम गर्नुपर्छ। समस्या पर्दा सजिलै पुग्न सक्ने वातावरण बने राम्रो हुन्छ।”
कार्यक्रममा उठेका सुझावहरूलाई कार्यान्वयनमा ल्याउनुपर्नेमा सहभागीहरूबीच सहमति समेत बनेको थियो। यस्ता अन्तरक्रिया कार्यक्रमहरूले नागरिक र प्रहरीबीचको विश्वास बढाउँदै आपसी समझदारी कायम गर्न सहयोग पुग्ने अपेक्षा गरिएको छ।
नागरिक–प्रहरी साझेदारी कार्यक्रमले शान्ति सुरक्षा कायम राख्न मात्र नभई सुशासन, पारदर्शिता र उत्तरदायित्व प्रवर्द्धनमा समेत महत्वपूर्ण भूमिका खेल्ने विश्वास व्यक्त गरिएको छ। स्थानीय तह, प्रहरी र नागरिकबीचको सहकार्य बलियो बनाउँदै समुदायमैत्री सेवा प्रवाहलाई प्रभावकारी बनाउने दिशामा यस्ता कार्यक्रमलाई निरन्तरता दिनुपर्नेमा जोड दिइएको छ।