पूर्वाधारमा बुद्धभूमिको फड्को

बुद्धभूमि (कपिलवस्तु), २३ बैशाख

बुद्धभूमि नगरपालिकाले पछिल्ला वर्षहरूमा भौतिक पूर्वाधार विकासमा उल्लेख्य प्रगति हासिल गरेको तथ्यांकले देखाएको छ। आ.व. २०७४/७५ देखि आ.व. २०८१/८२ सम्मको अवधिमा सडक, सिँचाइ, नाली लगायतका क्षेत्रमा निरन्तर विस्तार भएको छ, जसले स्थानीय विकासको गतिलाई तीव्र बनाएको संकेत गर्छ।
उपलब्ध विवरण अनुसार यस अवधिमा ग्राभेल सडक १४८.२१ किलोमिटर पुगेको छ, जसमा चालु आ.व. २०८१/८२ मा मात्र १०.२६ कि.मि. थपिएको छ। त्यस्तै कालोपत्रे सडक ४९.४८ कि.मि. र पिसिसी सडक ४५.८८ कि.मि. पुगेको छ। यी तथ्यांकले नगरभित्र सडक सञ्जाल विस्तारमा निरन्तर लगानी भइरहेको देखाउँछन्।
सडकसँगै जोडिएको सहायक पूर्वाधारमा पनि सुधार देखिएको छ। सडक नाली २८.३१ कि.मि. र सिँचाइ कुलो २६.९ कि.मि. पुगेको छ, जसले कृषि उत्पादन र शहरी व्यवस्थापनमा सकारात्मक प्रभाव पार्ने अपेक्षा गरिएको छ। त्यस्तै तारवार ८.५४ कि.मि. निर्माण भएको छ।
साना तर महत्वपूर्ण संरचनाहरूमा पनि प्रगति भएको छ। हालसम्म ६७ वटा स्ल्याब कल्भर्ट निर्माण भएका छन् भने अन्य सहायक संरचनाहरू (जस्तै ब्लक सडक र अन्य संरचना) पनि क्रमशः विस्तार हुँदै गएका छन्।
नगरपालिकाले योजना कार्यान्वयन प्रक्रियामा सुधार ल्याएको देखिन्छ। योजना सम्झौता समयमै गर्ने, प्राविधिकको सल्लाहबिना काम अघि नबढाउने, तथा लागत अनुमान अनुसार कार्य गर्ने प्रवृत्तिले कामको गुणस्तरमा सुधार आएको छ। यसले विकास निर्माणलाई व्यवस्थित र पारदर्शी बनाएको संकेत गर्दछ।
यद्यपि प्रगतिको गति सन्तोषजनक भए पनि केही संरचनागत चुनौतीहरू अझै कायम छन्। विशेष गरी निर्माणका क्रममा जग्गा विवाद एउटा अवरोध बनेको छ भने स्थानीय स्तरमा अपेक्षित सहयोग नपाउनु अर्को समस्या हो। यी समस्याले कतिपय योजनाहरू ढिलाइ हुने जोखिम बढाएको देखिन्छ।
नगरपालिकाले समाधानका रूपमा उपभोक्ता अभिमुखीकरण, समयमै योजना सम्झौता, तथा वडास्तरबाट कडाइका साथ अनुगमन गर्नुपर्ने आवश्यकता औंल्याएको छ। यस्ता उपायहरू प्रभावकारी रूपमा कार्यान्वयन भएमा विकास आयोजनाहरू अझ दिगो र परिणाममुखी बन्न सक्ने देखिन्छ।
समग्रमा, बुद्धभूमि नगरपालिकाले पूर्वाधार विकासमा उल्लेखनीय उपलब्धि हासिल गरेको छ। तर दिगोपन र गुणस्तर सुनिश्चित गर्न जनसहभागिता अभिवृद्धि, विवाद व्यवस्थापन र प्रभावकारी अनुगमन अपरिहार्य देखिन्छ। आगमी दिनहरुमा विकासको मात्रात्मक विस्तारसँगै गुणात्मक सुधारतर्फ ध्यान आफुहरुको ध्यान केन्द्रित भएको हुदा आगामी वर्षहरूमा अझ नमूना नगरपालिका बन्ने आधार तयार भएको नगर प्रमुख केशव श्रेष्ठको तर्क रहेको छ ।