बालबालिकासम्बन्धी ऐन संशोधनमा फेडोद्वारा छबुँदे संशोधन पेस

काठमाडौँ, २३ वैशाखः दलित महिला सङ्घ (फेडो) ले बालबालिकासम्बन्धी ऐन, २०७५ मा दलित बालबालिकाको परिभाषा थप्नुपर्नेलगायत छ बुँदे संशोधन प्रस्ताव पेस गरेको छ । आज महिला, बालबालिका तथा ज्येष्ठ नागरिक मन्त्रालयमा सुझाव पेस गर्दै फेडोले संविधानमा उल्लेख भएकाले समानताको अधिकार सुनिश्चित गर्न, विद्यालयमा हुने विभेद हटाउन ऐन संशोधन गरी ‘दलित बालबालिकामैत्री विद्यालय वातावरण, समावेशी पाठ्यक्रम, जातका आधारमा अपमानजनक शब्द, होच्याउने, विद्यालयमा हुने पूजाआजामा विभेद नगर्ने साथै छुवाछूत झल्किने गरी खेल नखेल्ने (एन्टी बुलिङ) नीति अनिवार्य गर्नुपर्ने’ सुझाव पनि पेस गरेको छ । फेडोले ऐनको दफा (६६) र (६७) मा ‘हिंसा र दुव्यवहार तथा छुवाछूतविरुद्ध संरक्षण’ थप्नुपर्ने, दफा (७२) र (८५) मा ‘दलित बालबालिकामाथि हुने हिंसा र छुवाछूत विभेदमा कडा सजायको व्यवस्था’ थप्नुपर्ने र दफा (२३) मा राष्ट्रिय बालअधिकार परिषद्अन्तर्गत ‘बालअधिकारका क्षेत्रमा काम गर्ने दलित समुदायबाट’ थप्नुपर्ने पनि सुझाव दिएको छ ।