दाङमा बन्दाबन्दीमा रोकिएको सडकका योजना शुरु

तुल्सीपुर, १४ बैशाख । सडक डिभिजन कार्यालय दाङअन्तर्गत चार योजना निर्माणको काम शुरु भएका छन् ।  लकडाउनका समयमा रोकिएका सडकका योजनामध्ये अहिलेती योजनाका काम शुुरु भएको कार्यालयका सूचना अधिकारी खुम भण्डारी जानकारी दिनुभयो । पूर्वपश्चिम राजमार्गअन्तर्गत लमही–शिवखोला सडक मर्मतको काम शुरु भएको छ । त्यस्तै घोराही–लमही सडक खण्डको सिस्ने खोला पुल, घोराही–धारापानी सडकअन्तर्गत बबई नदीमा पुल र घोराही उपमहानगरपालिका वडा नं १७ ढिकपुरको बबई नदीमा पर्ने पुल निर्माणको काम शुरु भएको उहाँले बताउनुभयो । 

         अहिले बजार बन्द हुँदा निर्माणका लागि आवश्यक सामग्री नपाउनु, मजदूरको सहज उपलब्धता नहुनुजस्ता कारणले काम प्रभावकारी रुपमा अघि बढ्न सक्ने अवस्था भने नभएको उहाँको भनाइ छ । यस्तै  तुलसीपुर उपमहानगरपालिकाले पनि विकास निर्माणका काम अघि बढाउन थालेको छ । त्यसका लागि वडाका सबै कर्मचारीलाई अनिवार्य कार्यालय आउन निर्देशन दिएको उपमहानगरपालिकाका प्रमुख प्रशासकीय अधिकृत कृष्णकान्त उपाध्यायले बताउनुभयो । साथै पूर्वाधार निर्माणका कार्य अघि बढाउनका लागि सबै उपभोक्ता समितिका अध्यक्षलाई जानकारी गराइएको छ ।  सामाजिक दूरी कायम राखी विकास निर्माणका काम अघि बढाउन थालिएको हो । (रासस)