माछा मार्न र पौडी खेल्न गएका दुई युवा बेपत्ता

दोलखा, १२ जेठ । दोलखाको तामाकोशी नदीमा माछा मार्नुका साथै  पौडी खेल्न गएका दुई युवा नदीले बगाउँदा बेपत्ता भएका छन् । दोलखाको मेलुङ गाउँपालिका–१ पवटी निवासी ३६ वर्षीय दीपक भुजेल आइतबार चैतेघाटस्थित तामाकोशी नदीमा माछा मार्न गएको र माछा मार्ने क्रममा उनलाई खोलाले बगाएको प्रहरीले जनाएको छ । 

            त्यस्तै कालीञ्चोक गाउँपालिका–७ ठूलाखेत बस्ने १९ वर्षीय नवराज पौडेल तामाकोशी नदीमा पौडी खेल्ने क्रममा नदीले बगाएको जिल्ला प्रहरी कार्यालयले जनाएको छ । बेपत्ता दुवै युवा आइतबार फरक फरक ठाउँमा माछा मार्न र पौडी खेल्न गएको स्थानीयले बताएका छन् । बेपत्ता भएका दुवैको स्थानीय तथा प्रहरीको सहयोगमा खोजी कार्य भइरहेको प्रहरीले जनाएको छ ।