पैसा र गरगहनाको झोला फिर्ता गर्ने चालक सम्मानित

दाङ २६ असार ।  दाङमा एकजना अटो चालकलाई प्रहरीले सम्मान गरेको छ। आफ्नो अटोका एक यात्रुले पैसा र गहनासहितको झोला बिर्सिएर गएपछि उक्त झोला ती चालकले प्रहरीलाई बुझाएका थिए।  शुक्रबार घोराही १३ बसपार्कबाट तुलसीपुर चोकसम्म रा १ ह २१५३ नम्बरको अटोमा जाँदा रोल्पा रुन्टिगढी गाउँपालिका–७ की ३० की मतिकला बुढाले झोला बिर्सिएर अटोमै छाडेकी थिइन्। उनको झोलामा नगद ३७ हजार र एक तोला सुनको सिक्री रहेको थियो। 

उक्त समान अटो चालक घोराही उपमहानगरपालिका–१३ का २९ वर्षीय रामप्रसाद झाँक्री मगरले सकुशल जिल्ला प्रहरी कार्यालय घोराही दाङमा बुझाएका थिए। इमान्दारपूर्वक उक्त पैसा र गहनासहितको झोला प्रहरीलाई बुझाएकाले उनलाई सम्मान गरिएको जिल्ला प्रहरी कार्यालय दाङका प्रवक्ता डिएसपी मुकुन्दप्रसाद रिजालले बताए।