काठमाडौँ, १३ मंसिर । प्रधानन्यायाधीश चोलेन्द्र शमशेर जबराविरुद्ध नेपाल बार एशोसिएशनले पाँचौँ चरणको आन्दोलनका कार्यक्रम सार्वजनिक गर्ने भएको छ । प्रधानन्यायाधीश जबराको राजीनामा माग्दै एक महिनादेखि आन्दोलनरत बारले सोमबार बार कार्यसमितिको बैठकपछि थप आन्दोलनका कार्यक्रम सार्वजनिक गर्न लागेको हो ।
बैठकमा आगामी आन्दोलनको मोडलबारे छलफल गर्ने र त्यसपछि घोषणा गरिने बार अध्यक्ष चण्डेश्वर श्रेष्ठले जानकारी दिनुभयो । बारले आइतबार पनि सर्वोच्च अदालत परिसरमा नियमित धर्ना दिएको थियो ।
प्रधानन्यायाधीश जबराले न्यायालय ध्वस्त पारेको आरोप लगाउँदै बहिर्गमनका लागि राजनीतिक दललाई पनि हारगुहार गरिरहेको छ । बारले यस विषयमा ध्यानाकर्षण गर्न सत्तारुढ नेपाली कांग्रेस, माओवादी केन्द्र, एकीकृत समाजवादी पार्टी, जसपालगायत विपक्षी दल नेकपा एमालेलाई पनि ध्यानाकर्षण गराइसकेको छ ।
यस्तै सभामुख अग्नि सापकोटा र राष्ट्रिय सभाका अध्यक्ष गणेश तिमल्सेनालाई पनि ध्यानाकर्षण पत्र बुझाइसकेको छ । तर यस विषयमा दलहरुले भने चासो देखाएका छैनन् ।
प्रतिक्रिया