कपिलवस्तुमा २लाख ७७ हजारले लिए कोरोना खोप : पुस ४ देखि विद्यार्थीलाई दिइने

सागर वि क
कपिलवस्तु २७ मंसिर । कपिलवस्तुमा हालसम्म २ लाख ७७ हजार बढीले कोरोनाविरुद्धको कम्तीमा एक मात्रा खोप लगाएका छन् । जिल्लाका १० पालिकामा संचालन गरिएको खोप अभियान अन्तर्गत २ लाख ७७ हजार बढीले एक मात्रा खोप लगाएका हुन् । यही मंसिर २० गते देखि संचालन गरिएको खोप अभियानमा एक हप्ताको अवधिमा एक लाख १० हजार बढीले एक मात्रा खोप लगाएको जिल्ला स्वास्थ्य कार्यालय कपिलवस्तुका प्रमुख हेमराज पाण्डेले जानकारी दिनुभयो ।
जिल्लाको बाणगंगा, बुद्धभूमि र कपिलवस्तु नगरपालिकामा भरोसेल खोप लगाईएको र बाँकीमा एस्ट्राजेनेका खोप लगाईएको हो । प्रमुख पाण्डेका अनुसार खोप लगाउन बाँकी रहेका बालबालिकालाई लक्षित गरी पुस ४ गतेदेखि खोप कार्यक्रम सुरु गरिने छ । जिल्लाका स्वास्थ्य संस्थाबाट १२ देखि १८ वर्षमुनिका बालबालिलाई मोर्डना खोप लगाउने तयारी गरिएको जिल्ला स्वास्थ्य कार्यालय कपिलवस्तुले जनाएको छ ।
सकेसम्म बालबालिकालाई नजिक पर्ने गरी खोप केन्द्रको व्यवस्थापन गरिने जिल्ला स्वास्थ्य कार्यालय कपिलवस्तुका प्रमुख पाण्डे बताउनुभयो । हालसम्म कति बालबालिकालाई खोप लगाईने हो भन्ने विवरण प्राप्त भई नसकेको र मोर्डना खोप नपुगेकालाई फाइजर खोप लगाइने प्रमुख पाण्डेले जानकारी दिनुभएको छ । बाणगंगामा हालसम्म ३६ हजार एक सय ९५ जनाले कोरोना विरुद्धको पूर्ण मात्रा खोप लगाएका बाणगंगा नगरपालिकाका स्वास्थ्य अधिकृत ठगराज पौडेलले जानकारी दिनुभयो ।
पौडेलका अनुसार यही मंसिर २३ गतेदेखि संचालन भईरहेको खोप अभियानमा १९ हजार १ सय ९५ जनाले खोप लिएका छन् । यही मंसिर २३ गतेपछि १८ बर्षमाथिका ११ हजार ८ सय ८३ जनालाई खोप लगाइएको बुद्धभूमि नगरपालिकाका जन स्वास्थ्य अधिकृत खुबिराम खनालले जानकारी दिनुभयो । उता कपिलवस्तुमा हैजा प्रभावित क्षेत्रका २ लाख ३० हजार बढीलाई हैजा विरुद्धको खोप उपलब्ध गराईएको जिल्ला स्वास्थ्य कार्यालय कपिलवस्तुले जनाएको छ ।