१५ बर्षे रणीनिती मस्यौदा तयार :कृषि सामाग्री र बजारको सुनिश्चितता प्रदेश सरकारले गर्ने

बुटवल १४ फागुन ।लुम्बिनी प्रदेश सरकारले प्रादेशिक कृषि विकास रणनीतिको मस्यौदा तयार गरेको छ । मस्यौदामा कृषिलाई व्यवसायिक बनाउन प्रतिस्पर्धात्मक कृषि प्रणाली, आयात प्रतिस्थापन र कृषिमा औद्योगिकरणलाई जोड दिइएको छ । कृषिको दिगो विकासका लागि कृषक संरक्षणमुखी कार्यक्रम ल्याउने, सरकारी स्तरबाट उत्पादन सामाग्री र बजारको सुनिश्चितता गर्ने एवं तीनै तहका सरकारबीचको समन्वयमा कृषि अभियान सञ्चालन गरिने उल्लेख छ । १५ वर्षीय रणनीतिक योजनामा नगदे र निर्यातमुखी बालीलाई प्राथमिकता दिंदै त्यसको क्षेत्र बढाउन जोड दिइएको छ । गुणस्तरीय बीउ उत्पादन गर्न हरेक जिल्लामा फरक फरक बालीका बिउ उत्पादन केन्द्र बनाउने योजना छ ।
जिल्ला समन्वय समितिमा कृषि प्राविधिक राखेर त्यसमार्फत प्राविधिक सेवाका काम गर्ने उल्लेख छ । मन्त्रालयका सचिव शान्ता कार्कीले सरोकारवालाका सबै सुझाव समेटेर रणनीति तयार गरिने बताउनुभयो । प्रदेश उपलब्ध खाद्यान्न बाली उत्पादनको स्थितिबाट आत्मनिर्भर छ । यसले छिमेकी गण्डकी, कर्णाली तथा सुदूरपश्चिम प्रदेशहरुलाई समेत निकासी गर्दछ । यहांको ६ सय ५५ वर्ग किलोमिटर अर्थात २९ प्रतिशत कृषि भूमि रहेको छ । त्यसमध्ये ५ सय ३९ वर्गकिलोमिटर क्षेत्रमा खेती गरिएको छ । बांझो जग्गा १ सय ७ हजार हेक्टर छ । ७६ प्रतिशत किसान परिवारले डेढ बिगाहभन्दा कम जग्गामा खेती गरेका छन् ।