विद्यालय गैरहेकी छात्राको बीच बाटोमै विभत्स हत्या

काठमाडौं २२ चैत । उदयपुरमा घरबाट विद्यालय गैरहेकी एक छात्राको बीच बाटोमै विभत्स हत्या भएको छ । 

उदयपुरको बेलका नगरपालिका–३ स्थित कोशी जनता माध्यमिक विद्यालय रामपुरमा कक्षा १० मा अध्ययनरत कविता सुनुवारको स्थानीय यसोदा खोलामा हत्या भएको हो । मंगलवार विहान उनी विद्यालय आउने क्रममा बाटोमै क्रुर र हिंस्रक ढंगले हत्या भएको विद्यालयका प्रधानाध्यापक सूर्य नारायण साहले जानकारी दिए । विद्यालयद्वारा एसईई परीक्षालाई लक्ष्यित गरी विहानको समयमा संचालित अतिरिक्त कक्षा लिन घरबाट आउने क्रममा बाटोमा पर्ने यशोदा खोला छेउ सुनुवारको हत्या भएको हो । वालिका हत्याको घटनाले बेलका नगरको सुरक्षामा गम्भीर प्रश्न उठेको भन्दै विद्यालयले छोरीहरुको सुरक्षामा विशेष गम्भीर बन्न राज्यको ध्यानाकर्षण गराएको छ । विद्यालय व्यवस्थापन समितिका अध्यक्ष गणेश बस्नेत र प्रधानाध्यापक साहले मंगलवार संयुक्त विज्ञप्ति प्रकाशित गरी घटनाको निष्पक्ष छानबिन गरी अपराधी पत्ता लगाएर कडा सजायँ दिन माग गरेका छन् ।

हत्या गरीएकी सुनुवार एक अनुशासित र मेहनती विद्यार्थी रहेको भन्दै विद्यालयले उनी आगामी बैशाखमा संचालन हुने एसईई परिक्षाको तयारी गरीरहेको जनाएको छ ।