चहलको ह्याट्रिक र बटलरको शतकसँगै राजस्थानको रोमान्चक जित

स्पिनर युजभेन्द्र चहलको ह्याट्रिक र जस बटलरको शतकमा राजस्थान रोयल्सले इन्डियन प्रिमियर लिग (आइपिएल) २०२२ मा कोलकाता नाइट राइडर्समाथि ७ रनको रोमान्चक जित हात पारेको छ ।

२ सय १८ रनको विजयी लक्ष्य पछ्याएको कोलकाता १९.४ ओभरमा २ सय १० रनमा अल आउट भयो । कोलकाताका कप्तान श्रेयस ऐरले ५१ बलमा ७ चौका र ४ छक्कासहित सर्वाधिक ८५ रन बनाए । आरोन फिन्चले २८ बलमा ९ चौका र २ छक्कासहित ५८ रनमा आउट भए ।

कोलकातालाई जितको लागि अन्तिम ६ बलमा ११ रन चाहिँएको थियो । पहिलो बलमा ओवेद म्याककोयले दुई र दोस्रो बलमा शेल्डन ज्याकसनलाई फाइन लेगमा क्याच गराए । तेस्रो बलमा बरुण चक्रवर्तीले एक रन दिँदै स्ट्राइक उमेद यादवलाई दिए । चौथो बलमा उमेश यादव २१ रनमा बोल्ड आउट भएपछि राजस्थानले रोमान्चक जित हात पारेको थियो । यादवले ९ बलमा १ चौका र २ छक्का प्रहार गरे ।

ओपनर सुनिल नारायण कुनै बल नखेली रन आउट भए । तर दोस्रो विकेटका लागि फिन्च र श्रेयस ऐरले ९ ओभरमा १ सय ७ रनको साझेदारी गरेपछि राजस्थान नै दबाबमा परेको थियो । फिन्च प्रसिद्ध कृष्णको बलमा प्वाइन्ट सट खेल्नेक्रममा करुण नायरबाट क्याच भए । नितिश राणा ११ बलमा १ चौका र १ छक्कासहित १८ रनमा आउट भए ।

कोलकातालाई ४२ बलमा ७० रन जितको लागि चाहिँएको थियो । आन्द्रे रसेल स्पिनर रविचन्द्रन आश्विनको १४ औं ओभरको चौथो बलमा गोल्डेन डक आउट भए । रसेल आश्विनको क्यारम बलमा बोल्ड हुन पुगे । कप्तान सन्जु स्यामसनले श्रेयस ऐरलाई ब्यक्तिग ६६ रनमा ठूलो जीवनदान दिएका थिए । तीव्र गतिका बलर आवेद म्याकोयको १५ औं ओभरको दोस्रो बलमा एज लागेपनि स्यामसनले सहज क्याच ड्रप गरेका थिए ।

श्रेयस ऐर स्पिनर युजभेन्द्र चहलको १६ औं ओभरको चौथो बलमा एलबीडब्लू आउट भए । रिभ्यु लिएपनि ऐर सफल हुन सकेनन् । जुन समय कोलकातालाई जितको लागि २० बलमा ३८ रन चाहिँएको थियो । तर लगत्तै अर्को बलमा शिवम माभी लङअनमा क्याच आउट भए । अन्तिम बलमा चहलले प्याट कमिन्सलाई कट विहान्ड गर्दै आफ्नो ह्याट्रिक पूरा गरे ।

त्यसअघि पहिलो बलमा वेंकटेश ऐर ६ रनमा स्टम्पिङ आउट भएका थिए । चहलले एकै ओभरमा चार विकेट लिएपछि राजस्थान हाबी बनेको थियो । १८ बलमा कोलकातालाई ३८ रन चाहिँएको थियो । १८ औं ओभरमा उमेश यादवले टे«न्ट बोल्टलाई एक चौका र २ छक्कासहित २० रन जोडेपछि खेल थप रोचक बनेको थियो ।

अन्तिम १२ बलमा १८ रन चाहिँएको थियो । १९ औं ओभरमा प्रसिद्ध कृष्णले ७ रन मात्र खर्चिए । युजभेन्द्र चहलले ४ ओभरमा ४० रन खर्चेर ५ विकेट लिए । डेब्यू खेल खेलेका तीव्र गतिका बलर आवेद म्याकोयले २, रविचन्द्रन आश्विन र प्रसिद्ध कृष्णले १-१ विकेट लिए ।

त्यसअघि ब्रेबोन क्रिकेट स्टेडियम मुम्बईमा टस हारेर ब्याटिङको निम्तो पाएको राजस्थानले निर्धारित २० ओभरमा ५ विकेट गुमाउँदै २ सय १७ रन बनायो । राजस्थानका जस बटलरले ६१ बलमा ९ चौका र ५ छक्का सहित १ सय ३ रनको योग्दान दिए । बटरलको जारी सिजनमा दोस्रो शतक हो ।

आइपिएल करिअरको तेस्रो शतक हो । बटलरले यस अघि यसै सिजनमा मुम्बईविरुद्ध ६८ बलमा ११ चौका र ५ छक्कासहित १ सय रनको शतकीय इनिङ खेलेका थिए । ओपनर बटलर र देवदत्त पाडिक्कलले पहिलो विकेटका लागि ९.४ ओभरमा ९७ रनको साझेदारी गर्दै उत्कृष्ट सुरुवात दिलाएका थिए ।

पाडिक्कल सुनिल नारायणको बलमा १८ बलमा ३ चौका र १ छक्कासहित २४ रनमा बोल्ड आउट भए । कप्तान सन्जु स्यामसनले १९ बलमा ३ चौका र २ छक्का सहित ३४ रन बनाए ।

बटलरले १७ औं ओभरको पहिलो बलमा प्याट कमिन्सलाई छक्का प्रहार गर्दै ५९ बलमा शतक प्रहार गरेका थिए । शिम्रन हेटमायर १३ बलमा २ चौका र २ छक्कासहित २६ रनमा अविजित रहे । कोलकाताका सुनिल नारायणले सर्वाधिक २ विकेट लिए । प्याट कमिन्स, शिवम माभी र आन्द्रे रसेलले १-१ विकेट लिए ।

अंक तालिका

गुजरात ६ खेलमा ५ मा जित र १ मा हार सहित १० अंकका साथ शीर्षस्थानमा छ । राजस्थान रोयल्स ६ खेलमा ४ मा जित र २ मा हार सहित ८ अंकका साथ दोस्रो स्थानमा उक्लिएको छ ।

लखनऊ ६ खेलमा ४ मा जित र २ मा हार सहित ८ अंक भएपनि नेटरनरेटका कारण तेस्रो स्थानमा छ । बेंगलोर ६ खेलमा ४ मा जित र २ मा हार सहित ८ अंक भएपनि चौथो स्थानमा छ । हैदराबाद पनि ६ खेलमा ४ मा जित र २ मा हार सहित ८ अंक भएपनि नेटरनरेटको कारण पाँचौं स्थानमा छ ।

कोलकाता नाइट राइडर्स ७ खेलमा ३ मा जित र ४ मा हार सहित छैटौं स्थानमा छ । पन्जाब ६ खेलमा ३ मा जित र ३ मा हार सहित सातौं स्थानमा छ । दिल्ली ५ खेलमा २ मा जित र ३ मा हार सहित आठौं स्थानमा छ । चेन्नई ६ खेलमा १ मा जित र ५ मा हार सहित नवौं स्थानमा छ । मुम्बई ६ खेलमा जित बिहीन हुँदै पुछारमा छ ।