बाग्मती प्रदेशका मुख्यमन्त्री जम्कट्टेले पाए दोस्रो पटक विश्वासको मत

काठमाण्डौ, १० चैत्र । बाग्मती प्रदेशका मुख्यमन्त्री शालिकराम जम्कट्टेलले प्रदेश सभाबाट विश्वासको मत पाउनुभएको छ ।प्रदेश सभा भवन हेटौँडामा आज शुक्रवार भएको मत विभाजनमा जम्कट्टेलले एक सय १० जना सांसदमध्ये ६७ जनाको मत पाउनुभएको हो । विश्वासको मत प्राप्त गर्न जम्मा ५६ मत भए पर्याप्त हुन्थ्यो ।

जम्कट्टेललाई नेपाली कांग्रेसका ३७, नेकपा माओवादी केन्द्रका २१, नेकपा एकीकृत समाजवादीका सात र हाम्रो नेपाली पार्टीका दुई जना सांसदले मत दिएका छन् । एमाले, राप्रपा र मजदुर किसान पार्टीले भने मत दिएनन् ।

जम्कट्टेलले गएको पुस २५ गते मुख्यमन्त्री नियुक्त भएर माघ ३ गते विश्वासको मत लिनुभएको थियो । राप्रपाले समर्थन फिर्ता लिएपछि उहाँले आज दोस्रो पटक विश्वासको मत लिनुभएको हो ।

आजै बाग्मती प्रदेश सरकारबाट नेकपा एमाले बाहिरिएको छ । आजको प्रदेश सभा बैठकमै एमाले संसदीय दलका नेता तथा आर्थिक योजना मन्त्री जगन्नाथ थपलियाले राजीनामा बुझाउँदै मन्त्रीहरू बाहिरिएको जानकारी गराउनुभएको हो । सरकारमा एमालेका चार जना मन्त्री थिए ।