शितगंगामा औधोगिक ग्राम बन्ने निर्णयले सिंगो जिल्ला खुशी

अर्घाखाँची १३ असार । सरकारले अर्घाखाँचीको शीतगंगा नगरपालिका वडा नं. १३ मा औद्योगिक ग्राम बनाउने निर्णय गरेपछि समग्र अर्घाखाँचीमा खुशीयाली छाएको छ । मंगलबार बसेको मन्त्रिपरिषद्को बैठकले देशभरका ७ वटा स्थानीय तहमा औद्योगिक ग्राम स्थापना गर्न सहमति दिएको थियो । सोही अनुसार लुम्बिनीको शीतगंगा नगरपालिका पनि परेको हो । सरकारका प्रवक्ता एवम् सञ्चार तथा सूचना प्रविधिमन्त्री रेखा शर्माले देशका विभिन्न सात ठाउँमा औद्योगिक ग्राम बनाउने निर्णय भएको बताइन । यता शीतगंगा नगरपालिकाका पूर्व नगर उप्रमुख टीका रेश्मीले शीतगंगा १३ मा औद्योगिक ग्राम बनाउने मन्त्रिपरिषद बैठकले निर्णय गरेकोमा धन्यवाद प्रकट गरे ।
२०७६ सालमा एक निर्वाचन क्षेत्र, एक औद्योगिक ग्राम बनाउने नीति अनुसार शीतगंगाको १३ नं. वडामा औद्योगिक ग्राम बनाउने गरी जिल्लास्तरमा निर्णय भएको बताए । सोही अनुसार औद्योगिक ग्राम स्थापना हुने स्थान थाप्लेबारीको माटो समेत परिक्षण भएर काम अगाडि बढेको जनाए । तर बीचमा काम हुन नपाइरहेको बेला मन्त्रिपरिषद बैठकले उक्त निर्णय गरेकोमा यस क्षेत्रका नागरिक मात्र नभएर सिंगो जिल्ला खुसी भएको बताए । ३५ रोपनी जग्गा रहेको उक्त स्थानमा औद्योगिक ग्राम स्थापनाका लागि आफूसँगै पूर्व नगर प्रमुख सूर्य प्रसाद अधिकारी, वडा नं. १३ का वडाध्यक्ष दुर्गा विसीको मुख्य पहल रहेको स्मरण गरे । यहाँ औद्योगिक ग्राम स्थापना पछि रोजगारीका अवसर सिर्जना हुने समेत उनले विश्वास दिलाए