भूमिहीन दलित र सुकुम्वासीलाई लालपुर्जा वितरण सुरु

परासी १४ असार ।पश्चिम नवलपरासीमा भूमिहीन दलित तथा भूमिहीन सुकुम्बासीलाई जग्गाधनी लालपुर्जा वितरण सुरु भएको छ । बर्दघाट नगरपालिकाबाट पुर्जा वितरण सुरु भएको हो । पहिलो चरणमा भूमिहीन दलितलाई जग्गाको धनीपुर्जा वितरण गरिएको हो । बिहीबार भूमिहीन १० दलित परिवारलाई जग्गाधनी पुर्जा वितरण गरिएको छ ।

भूमि व्यवस्था सहकारी तथा गरिबी निवारणमन्त्री रञ्जिता श्रेष्ठ र पश्चिम नवलपरासी क्षेत्र नम्बर १ का सांसद बिनोद चौधरी, कांग्रेस नेता देवेन्द्रराज कँडेलले भूमिहीनलाई पुर्जा वितरण सुरु गरेका थिए । अब क्रमशः जिल्लाका अन्य पालिकामा पनि वितरण गरिने बताइएको छ ।यसअघिका आयोगले अधुरा राखेका काम र अहिले परेका निवेदनमध्ये १ हजार ९ सय ९६ वटा कित्ताको नाप नक्सा तयार भएको र क्रमशः पुर्जा वितरण गर्दै जाने भूमि आयोग पश्चिम नवलपरासीका अध्यक्ष देवराज भण्डारीले बताए ।