हरि घिमिरे, २८ असोज ।
कपिलवस्तुको बाणगङ्गा वडा न. ८ मा रहेको मधुवन सामुदायिक वन उपभोक्ता समितिको १८ औं वार्षिक साधारण सभा सम्पन्न भएको छ । शनिवार वनको प्राङ्गणमा १८ औं वार्षिक साधारण सम्पन्न भएको हो । साधारण सभामा वन ऐन नियम अनुसार गर्नुपर्ने उत्पादनशील वनको हकमा उपभोक्ता समूहको चाहनामा समूहले वन संवर्द्धन प्रणालीमा गर्नुपर्ने भूमिकाको विषयमा चर्चा गरिएको थियो ।
कार्यक्रममा बोल्दै कार्यक्रमका प्रमुख अतिथि तथा डिभिजन वन कार्यालय कपिलवस्तुका जिल्ला वन अधिकृत विजयराज सुवेदीले हावामा उडेको चिजलाई प्रयोगमा ल्याँउदा पछिल्लो समयमा वनले फाइदा ल्याउन सफल भएको बताए । उनले वन सम्वर्द्धन प्रणालीमा आधारित वन व्यवस्थापन नेपालमै कपिलवस्तु जिल्लाबाटै सुरुवात भएको बताउँदै प्राकृतिक श्रोतलाई सही सदुपयोग गरी वन व्यवस्थापनलाई अगाडि बढाउँदै लैजानुपर्ने बताए । उनले वन अतिक्रमणलाई नियन्त्रण गर्नुपर्ने, सामुदायिक वनमा रहेका खोल्साखोल्सीहरुलाई संरक्षण गर्नु पर्नेमा सामुदायिक वनले विशेष पहल गर्नुपर्नेमा जोड दिए ।
कार्यक्रमका विशिष्ट अतिथि वडा न. ८ का वडा अध्यक्ष बाबुराम अर्यालले वनको दिगो संरक्षण र सम्वर्द्धनमा सबैले आ–आफ्नो क्षेत्रबाट सहयोग गर्नु पर्ने बताए । उनले वनको बजेट वडाको भन्दा धेरै भएकाले सामुदायिक बनले वडा विकासको निम्ति समन्वय, सहकार्य गर्न आवश्यक रहेको बताए । उनले फरक प्रसङ्गमा वडा न. ८ भौगोलिक हिसाबले ठुलो वडा भएकाले विकास कम देखिएको बताए । यद्यपि उनले नगरपालिकाका सबै वडामा भन्दा वडा न. ८ मा धेरै संघ र प्रदेश बाट बजेट पार्न सफल भएको बताए ।
कार्यक्रमका विशिष्ट अतिथि तथा वैज्ञानिक वन व्यवस्थापन समितिका केन्द्रिय बरिष्ठ उपाध्यक्ष डिल्लिराज रेग्मीले सरकारले वैज्ञानिक वनलाई पटक पटक खारेज गर्दापनि आफूहरूले जोगाउन सफल भएको बताए । उनले वनहरूको योगदानका कारण देशमा आमूल परिर्वतन आएको र सबै सामुदायिक वनमा महिलाहरूलाई आबद्ध गराउँदै उनीहरूको नेतृत्व विकासका साथै आय आर्जनतर्फ अगाडि बढ्नुपर्नेमा जोड दिए ।
यस्तै सभामा समूहको वार्षिक प्रगति प्रतिवेदन तथा आगामी वनको भावी रणनिति बारेमा समूहका अध्यक्ष शान्त विक्रम पौडेलले प्रस्तुत गरेका थिए । उनले चालु आर्थिक वर्ष २०८०।०८१ का लागि ३ करोड ९४ लाख बराबरको अनुमानित बजेट पेश गर्दै वन उपभोक्ता समूहबाट अति विपन्न वन उपभोक्ता परिवारलाई आवास सहयोग, गरिबी न्यूनिकरण तथा जिविकोपार्जन सहयोग कार्यक्रम, आर्यआर्जन व्यवसायमुखी तालिम , महिला सशक्तीकरण, सामुदायिक वन विकास संरक्षण गर्ने, आयआर्जनका लागी सहुलियत ऋण प्रदान, सर्पदंश केन्द्रलाई सामाग्री सहयोग गर्ने, चिकित्सकद्वारा स्वास्थ्य शिविर सञ्चालन, खेलकुद व्यवस्थापन गर्ने लगायत विभिन्न कामहरू गर्ने बताए ।
कार्यक्रममा वनका सचिव अनिता थापाले प्रगति प्रतिवेदन प्रस्तुत गरेकी थिइन । त्यस्तै आर्थिक वर्ष २०७९/०८० को आर्थिक प्रगति प्रतिवेदन वनका कोषाध्यक्ष सरिता अर्यालले प्रस्तुत गरेकी हुन । उनले आर्थिक वर्ष ०७९/०८० को कुल १ करोड १७ लाख बराबरको आय– व्यय सार्वजनिक गरेकी थिइन ।
कार्यक्रममा सल्लाहकार सदस्यहरू, लेखा समिति संयोजक, उपभोक्ताहरू, सुरक्षाकर्मी , शिवपार्वती खानेपानी उपभोक्ता समितिका अध्यक्ष, मोतिपुर खानेपानीका उपाध्यक्ष, वडा सदस्य, टोल विकास संस्थाका अध्यक्ष लगायतले आ – आफनो धारणा राख्दै साधारण सभाको सफलताको शुभकामना दिएका थिए । कार्यक्रम वनकी सचिव अनिता थापाको सञ्चालनमा सम्पन्न भएको थियो । ४ सय ५० हेक्टर क्षेत्रफलमा फैलिएको यस वनमा १ हजार ३५ बराबर सदस्य आवद्ध रहेका छन् ।
प्रतिक्रिया