कोरोनाबाट इटालीमा २४ घण्टाभित्र ३ सय ६८ को मृत्यु

रोम, ३ चैत । इटालीमा आइतबार कोरोनाभाइरसको सङ्क्रमणबाट सबैभन्दा धेरै मानिसको मृत्यु भएको छ । विश्वभर ६ हजारभन्दा बढी व्यक्तिको ज्यान लिएको कोरोनाको सङ्क्रमण रोक्न युरोपेली मुलुकका सरकारहरूलाई अझ बढी नियन्त्रणका उपाय अबलम्बन गर्न बाध्य बनाएको छ ।  इटालीमा आइतबार कोरोनाको सङ्क्रमणबाट ३६८ जनाको मृत्यु भएको छ । इटालीमा मृतकको सङ्ख्या योसमेत एक हजार ८०९ पुगेको छ । चीनपछि सबैभन्दा प्रभावित मुलुक अब इटाली भएको छ । 

भ्याटिकनले पनि इस्टर सप्ताह समारोह रद्द गरेको छ । पोप फ्रान्सिस आइतबार भ्याटिकन शहरमा पैदल हिँडेर कोरोनाभाइरस महामारीको शिकार भएकाहरूका लागि एउटा गिर्जाघरमा प्रार्थना गर्न जानु भएको थियो कोरोनाभाइरसबाट प्रभावित फ्रान्स र स्पेनमा पनि क्याफे, पसल र रेस्टुरेन्टहरू बन्द गरिएका छन् । फ्रान्सले अति जरुरी बाहेकका व्यवसायहरू बन्द गर्न आदेश दिएको छ भने स्पेनले एक कदम अगाडि गएर मानिसहरूलाई स्वास्थ्य सेवा वा खाद्यान्न किन्न बाहेकका अरू काममा घर छोड्न प्रतिबन्ध लगाएको छ । जर्मनीमा कोरोना सङ्क्रमित व्यक्तिको सङ्ख्या बढेपछि फ्रान्स, अस्ट्रिया, स्विट्जरल्याण्ड, लक्जमबर्ग र डेनमार्कसँगका सीमामा सोमबारदेखि कडाइ गरेको छ । (रासस÷एएफपी)