कोरोना कहरः एकै दिन ५ हजारको मृत्यु, अमेरिकामा मास्क पाइन छाड्यो वरिष्ठ वैज्ञानिक पनि रहिनन्

 एजेन्सी, २० चैत ।  विश्वभर महामारीको रुप कोरोना भाइरस अर्थात् कोभिड १९ संक्रमणबाट एकै दिनमा झण्डै ५ हजार जनाको मृत्यु भएको छ ।  विश्वभर एकै दिन ७६ हजार नयाँ संक्रमित फेला परेका छन् । एजेन्सीहरुका अनुसार अमेरिकामा विगत २४ घण्टामा १ हजार भन्दा बढीको मृत्यु भएको छ । त्यहाँ २६ हजार भन्दा बढी नयाँ संक्रमित फेला परेका छन् ।

        योसँगै अमेरिकामा मृत्यु हुनेको संख्या ५ हजार नाघेको छ भने संक्रमितको संख्या २ लाख १४ हजार पुगेको छ । अमेरिकामा मास्कको अभाव भएपछि घरबाहिर निस्किनुपर्ने मानिसले कपडाकै मास्क भए पनि लगाउनु पर्ने छलफल सुरु भएको छ ।  विश्वभर कोरोना भाइरसबाट संक्रमित हुनेको संख्या ९ लाख ३० हजार भन्दा बढी पुगेको छ । जसमध्ये झण्डै २ लाख मानिस उपचारपछि निको भएका छन् भने मृत्यु हुनेको संख्या झण्डै ४७ हजार पुगेको छ ।

        कोरोना भाइरसको संक्रमणबाट दक्षिण अफ्रिकाकी एक एचआईभी वैज्ञानिकको मृत्यु भएको छ । एचआईभीको उपचार र औषधि पत्ता लगाउने कार्यमा लामो समयसम्म काम गरेकी वरिष्ठ वैज्ञानिक गीता रामजीको कोरोना भाइरसको संक्रमणका कारण मृत्यु भएको छ ।