अमेरिकामा छैन ‘लकडाउन’, २ लाख बढी संकमित ४७ सय बढीको मृत्यु

एजेन्सी, २० चैत । अमेरिकी राष्ट्रपति डोनाल्ड ट्रम्पले कोरोना (कोभिड–१९) संक्रमण थप फैलन नदिन लकडाउन गर्नेबारे आफूले केही नसोचेको र अमेरिकामा लकडाउन नभएको बताएका छन् ।  बुधरबार आयोजित पत्रकार सम्मेलनमा राष्ट्रपति ट्रम्पले अहिले नै देशभित्र चलिरहेका रेल र आन्तरिक उडान रोक्नेबारे पनि कुनै विचार नगरेको धारणा राखेका हुन् ।  ट्रम्पले एउटै मास्क २० पटकसम्म प्रयोग गर्न भनेका छन् ।  गत मंगलबार त उनले मास्क नहुनेहरुलाई कपडाले मुख छोप्न आग्रह गरेका थिए । 

        जोन हप्किन्स विश्वविद्यालयले सार्वजनिक गरेको ताजा तथ्यांकअनुसार अमेरिकाभर हालसम्म २,१३,३७२ वटा कोरोना संक्रमणका मामिला भेटिएका छन् । अहिलेसम्म ४,७५७ जनाको मृत्यु भएको छ । अन्य भूभागको तुलनामा न्युर्योकमा सबैभन्दा धेरै मानिसमा संक्रमण भेटिएको त्यहाँका गभर्नर एन्ड्रयु कुओमोले जानकारी दिएका छन्। अन्य राज्यहरुमा पनि भयानक स्थिति आउन सक्ने चेतावनी दिइएको छ ।