भारतीय नागरिक जबरजस्ती नेपाल छिर्न खोजेपछि हवाई फायर

सर्लाही, १८ जेठ । भारतीय नागरिक जबरजस्ती नेपाल छिर्न खोजेपछि प्रहरीले हवाई फायर गरेको छ । भारतीय नागरिकको समूह जबरजस्ती नेपाल प्रवेश गर्न खोजेपछि सर्लाहीमा गोली चलेको छ । सर्लाहीको सीमा सुरक्षार्थ खटिएको सशस्त्र प्रहरीको टोलीले जबरजस्ती आउने भारतीयलाई रोक्न हवाई फायर गरेको हो ।

         उनीहरुले प्रहरीका हतियार खोस्न प्रयास गरेका थिए ।एउटा समूह हुलहुज्जत गर्दै नेपाल प्रवेश गरेको थियो । सर्लाहीको विष्णु गाउँपालिका–२ पकडी स्थित दशगजा क्षेत्रबाट करिब ३०/४० जनाको समूह नेपाल प्रवेश गर्न खोजेपछि एक राउन्ड हवाई फायर गर्नु परेको प्रहरीले जनाएको छ । हवाई फायर गरेपछि भारतीय समूह तितरवितर भएको थियो । सर्लाहीको विष्णु गाउँपालिका–२ पकडी स्थित दशगजा क्षेत्रमा बीओपी सिमराको टोली खटाइएको छ । अहिले स्थिति सामान्य बन्दै गएको सशस्त्र प्रहरीले जनाएको छ ।