कर दाखिलाको निर्णय फिर्ता नलिए चरणवद्ध आन्दोलन

बुटवल, २१ जेठ । नेपाल उद्योग वाणिज्य महासंघ प्रदेश नं. ५ समितिले जेठ २५ सम्म कर दाखिला गर्न सरकारले जारी गरेको निर्णय फिर्ता नलिए आन्दोलन गर्ने जनाएको छ । संघले सरकारको निर्णय फिर्ता नलिए चरणवद्ध आन्दोलन गर्ने चेतावनी सेमत दिएको छ ।

        महासंघका प्रदेश ५ अध्यक्ष गुणनिधि तिवारीले प्रेस विज्ञप्ति जारी गर्दै कोरोना महामारीको विश्वव्यापी असर र जारी लकलकडाउनका कारण उद्योग–व्यवसाय नचलेका कारण आफूहरु मारमा परेको उल्लेख छ । कोरोना महामारीको विषम परिस्थितिमा व्यवसायीलाई राहत दिनुको साटो उल्टो कर दाखिलाको ताकेता गर्नु आपत्तिजनक भएको विज्ञप्तिमा उल्लेख छ ।

        जेठ १५ गते सर्वोच्च अदालतले लकडाउन अवधिलाई शून्य समय मान्ने फैसला गरेको सन्दर्भमा सरकारले त्यसलाई समेत बेवास्ता गर्दै जेठ २५ सम्म मूल्य अभिवृद्धि कर, अन्त शुल्क र अग्रिम आय कर बुझाउन सूचना जारी गरेको भन्दै महासंघले त्यसको विरोध गरेको छ । सरकारले तोकेको मितिमा कुनै पनि हालतमा कर दाखिला गर्न सक्ने व्यवसायीको अवस्था नरहेको  महासंघले जनाएको छ ।