बुटवल, २ असार । बुटवल उपमहानगरपालिका वडा नम्बर ३ ज्योतिनगरमा रहेको जनज्योती प्राथमिक विद्यालयलाई कान्ति माविसँग गाभ्न गरिएको निर्णय मान्य नभएको नेपाली कांग्रेस वडा समिति बुटवलले जनाएको छ । प्राविको स्तरोन्नती गर्नुको साटो अर्काे कान्ति माविसँग गाभ्ने गरि गरिएको प्रयास आफुहरुलाई मान्य नभएको कांग्रेस वडा समितिले बताएको हो । समितिले सोमबार एक विज्ञप्ती निकालेर विद्यालयको भौतिक तथा शैक्षिक विकाससँगै स्तरोन्नती गर्नु साटो अन्य विद्यालयसँग गाभ्ने निर्णय गरेमा त्यसबाट आईपर्ने दुर्घटनाको जिम्मेवार सम्वन्धित कार्यालयनै हुने चेतावनी समेत दिइएको छ ।
कांग्रेस वडा नम्बर ३ का वडाध्यक्ष रामकृष्ण पछाईले जारी गरेको विज्ञप्तीमा म्याद सकिएको विद्यालय ब्यवस्थापन समितिले बैठकको आब्हान गरेर विद्यालय मर्जर गर्ने गरि गरेको निर्णय र सोका लागि गठन गरिएको वार्ता समिति आफुहरुलाई मान्य नभएको उल्लेख गरिएको छ । विद्यालयको पठनपाठनलाई अंग्रेजी माध्यममा लानुपर्ने, भौतिक तथा ब्यवस्थापकीय उन्नती गर्नुका साटो अन्य विद्यालयसँग गाभ्ने भनि गरिएको छलफल र वार्ताको औचित्य नभएको समेत विज्ञप्तीमा उल्लेख छ ।
समितिले विद्यालयको स्तरोन्नती गर्नुपर्ने, विद्यालय ब्यवस्थापन समिति पुनः गठन गर्नु पर्ने लगायतका माग राखिएको समेत जनाएको छ । विद्यालय गाभ्ने निर्णय रोक्न माग गर्दै कांग्रेस वडा समितिले बुटवल उपमहानगरपालिका र शिक्षा महाशाखामा निवेदन दिएको छ । यसअघि पाँच दर्जन स्थानीय शिक्षाप्रेमीले हस्ताक्षर गरेर विद्यालयको स्तरोन्नतीका लागि बुटवल उपमहानगरपालिका, शिक्षा महाशाखा र कांग्रेस वडा कार्यालयमा हस्ताक्षर संकलन गरि बझाएका छन् ।
प्रतिक्रिया