शत्रु जीव सलहले मकै बाली खाइदिँदा अर्घाखाँचीमा खाद्यान्न अभाव हुने चिन्ता

  अर्घाखाँची १६ असार ।  अर्घाखाँची जिल्लामा  शत्रु जीव सलहले आकास ढाकेपछि स्थानीयहरु थाल ठटाउदै आगो बालेर सलह धपाउन लागि परेका छन् । सन्धिखर्क नगरपालिका, शितगंगा नगरपालिका, भुमिकास्थान नगरपालिका, छत्रदेव गाउँपालिका, मालारानी गाउँपालिका र पाणिनि गाउँपालिका सबैतिर सलह देखिएको छ ।  जिल्लाका प्राय सबैजसो क्षेत्रमा सलहले मकैबाली नष्ट गरेको छ । दुई दिनदेखि फैलिएको सलह अझैसम्म बालीमा देखिएको छ । कृषकहरु कसरी खेती बाली जोगाउने भनेर चिन्तित बनेका छन् । 

         गाउँगाउँमा पनि सलह फैलिएर मकै तथा तरकारी बाली खान थालेपछि कसरी सलह धपाउने भनेर चिन्तित बनेका हुन् । बारीमा भएको मकैभरि सलहले ढाकेको मालारानी ७ बामरुकका इन्द्रलाल रेग्मीले बताउनु भयो । हुर्कंदै गरेको मकैबाली सलहले नष्ट गरेपछि खाद्यान्न अभाव हुने चिन्तामा किसान छन् ।