काठमाडौं, १८ असार । गएको शनिबार नेपाल प्रवेश गरेको विभिन्न झुण्डमा आएका सलह किरामध्ये धेरैजसो बगाल दाङ र प्युठानको सेरोफोरोमा रहेको प्लान्ट क्वरेण्टीन तथा विषादी व्यवस्थापन केन्द्रले जनाएको छ ।
केन्द्रका अनुसार अर्घाखाँचीमा गएको झुण्ड पनि प्युठानतर्फ नै मोडिएको छ । हावाको गतिका कारण ती झुण्ड सुदूरपश्चिम र कर्णाली प्रदेशमा प्रवेश गर्ने सम्भावना रहेको भन्दै केन्द्रले सचेतता अपनाउन आग्रह गरेको छ ।
सलह काठमाण्डौ उपत्यकासहित देशका विभिन्न जिल्लामा पुगेका छन् । अन्यत्र गएका झुण्डमा थोरै सङ्ख्या रहेको र दाङ तथा प्युठानतर्फ गएको झुण्डमा धेरै सलह रहेकोले त्यस क्षेत्रमा धेरै क्षति हुने आँकलन गरिएको केन्द्रले जनाएको छ ।
यसैबीच भारतको उत्तर प्रदेशको इटवा क्षेत्रमा रहेका दुई वटा ठूला झुण्ड पनि नेपाल आउने सम्भावना रहेकोले थप सजगता अपाउनुपर्ने केन्द्रले जनाएको छ । ती दुई वटा झुण्ड तीन दिनभित्र भारतको फत्तेपुर आइपुग्ने सम्भावना रहेकोले त्यसपछि नेपाल आउने सम्भावना रहने भन्दै केन्द्रले तराई, भित्री मधेश र मध्य पहाडी क्षेत्रमा सजगता अपाउनुपर्ने जनाएको छ । विगतमा शत्रुजीव सलहका कारण पाकिस्तान लगायतका देशले भोकभरीको समस्यासँग जुध्नु परेको थियो ।
प्रतिक्रिया