मुख्यमन्त्रीको गृह जिल्लामा नयाँ रडाको शुरु

दाङ २० असार । प्रदेश ५ को अधिकांश वजेट र सेवा सुविधा दाङमा केन्द्रित गर्न ३ वर्ष सम्म अनवरत रुपमा सफल प्रदेश ५ का मुख्य मन्त्री शंकर पोख्रेलको गृह जिल्लामा एउटा नयाँ रडाको शुरु भएको छ । दाङका बिभिन्न पालिकाका मेयरले फेसबुक मै स्टाटस लेखेर मुख्यमन्त्रीको ब्यवस्थापनमा प्रश्न उठाएपछि यस्तो विवाद सतहमा आएको हो । विवरण अनुसार राप्ती स्वास्थ्य विज्ञान प्रतिष्ठान, घोराहीले कोरोना परिक्षणको शुल्क उठाउन पत्र लेखेपछि विरोध शुरु भएको छ ।प्रतिष्ठानले प्रति ब्यक्ति ५५०० को दरले स्थानिय पालिकाहरूसंग पैसा मागेको बुझिएको छ ।

        लमही नगरपालिकामा पठाएको पत्रमा सरकारले बजेट नदिएको र पिसिआर मेसिन आफै खरिद गरेको भन्दै पैसा मागेको कामु रजिष्टार कैलास प्रसाद देवद्वारा हस्ताक्षरित पत्रमा उल्लेख छ ।पत्रमा लमही नगरपालिकाका ४७१ जनको ५५०० को दरले हुन आउने रकम शोधभर्ना गर्न भनिएको छ । पैसा नपाएको भन्दै प्रतिष्ठानले स्वाव लिन नमानेपछि जिल्लाका स्थानिय तहहरूले संकलन गरेको स्वाव नेपालगञ्ज र काठमाण्डौ पठाएका छन् । तुलसीपुर उपमहानगरपालिकाका नगरप्रमुख घनश्याम पाण्डेले फेसबुक स्टाटसमै त्यसको बिरोध गरेका छन् ।

        उनले लेखेका छन्,‘कोरोना परिक्षणमा राप्ती स्वास्थ्य बिज्ञान प्रतिष्ठानले नमुना फिर्ता गर्ने, परिक्षण नगर्ने कार्य मानवता बिरोधी छ  मुख्यमन्त्री ज्यू सख्त कार्बाही होस ।लमही नगरपालिकाले सरकारले पठाएको मेसिन र कीट भएकोले पैसा नतिर्ने बताएको छ । लमही नगरपालिकाका नगरप्रमुख कुलबहादुर केसीले मुख्यमन्त्रीसंग कुरा गरेर उक्त पत्रको जवाफ दिने बताएका छन् ।