कपिलवस्तु २३ असार .लकडाउनका कारण लामो समय देखी घर बस्दै आएका बालबालिका शुक्रवार विद्यालय पुगे । फाल्गुनको अन्तिम साता वार्षिक परीक्षा दिए पछि बालबालिकाहरू विद्यालय गएका थिएनन् । कोरोनाका कारण विद्यालय बन्द हुँदा साना बालबालिकाको अधिकांश समय खेलेर बिताउने गरेका थिए । विद्यालयमा क्वारेनटाइन स्थापना भए पछि उनीहरू विद्यालय भित्र छिर्न समेत पाएका थिएनन् ।
कपिलवस्तुको शिवराज ९ बिजगौरीकी शुभेच्छा पुरी आफ्ना बुवा सँगै विद्यालय आइन । शिव गढी आधारभूत विद्यालयमा बाल विकासबाट कक्षा १ मा पुगेकी थिइन । चार महिना पछि विद्यालय पुग्दा उनी खुसी देखिन्थिन् । विद्यालयमा साथीहरू सँग रमाइलो गर्दै थिइन । उनका बुवाले एउटा पोका सामान दिए । पोका भित्र रङ्गीचङ्गी पुस्तक, लुँडो, कलर पेन्सिल, मोमकलर, पेन्सिल, कटर ईरेजर र सानो बल थियो । सवैका हातमा ती समान थिए । सामान पाए उनीहरू निकै खुसी देखिन्थे ।खुसीले गद गद हुँदै घर फर्किए ।
बालबालिकाहरू रमाउँदै लुँडो खेल्न सुरु गरे । शुभेच्छाले नयाँ पुस्तक निकालिन । बुवा आमाको नजिक बस्दै पुस्तकमा भएको चित्रमा रङ्ग लगाउन सुरु गरिन । अभ्यास पुस्तिका र सिकाई सामाग्री पाए पछि अहिले उनीहरू घरमै बसेर पढ्न सुरु गरेका छन् ।महिनौँ पछि पुस्तक र सिकाई सामाग्री पाउँदा बालबालिका दङ्ग परे । कपिलवस्तुमा बाल विकास देखी ३ कक्षा सम्म पढ्ने बालबालिकालाई सिकाई सामाग्री हस्तान्तरण गर्न सुरु गरिएको छ । ४५ दिनको क्रियाकलाप भएको पुस्तक कालिका स्वावलम्बन सामाजिक केन्द्रले र युनिसेफको सहयोगमा वितरण गर्न सुरु गरिएको हो ।
प्रतिक्रिया