अर्घाखाँचीमा थप एकसाता भदौ २४ सम्म निषेधाज्ञा

अर्घाखाँची  १७ भदौ । अर्घाखाँचीमा भदौ २४ गते राती १२ बजेसम्मका लागी निषेधाज्ञा थप गरिएको छ । भदौ १७ गते बुधबार राति १२ बजे निषेधाज्ञाको अवधी सकिन थालेपछी रायसुझावको आधारमा निषेधाज्ञा भदौ २४ सम्म थप गर्ने निर्णय भएको जिल्ला प्रशासन अर्घाखाँचीले जनाएको छ  ।  जिल्ला प्रशासन कार्यालयमा बसेको राजनितिक दल र सञ्चारकर्मीसँगको छुट्टाछुट्टै भेटघाटमा निषेधाज्ञा  थप गर्न मंगलबार सुझाव दिएका थिए । बुधबार बिहान जिल्ला प्रशासन कार्यालयमा बसेको डिसीसीएमसीको बैठकले भदौ २४ गते राती १२ बजेसम्म निषेधाज्ञा  थप गर्ने निर्णय गरेको जिल्ला प्रशासन कार्यालयका सुचना अधिकारी बिक्रम थापाले बताए ।

          तराईसँग सिमाना जोडिएका छिमेकी जिल्ला रुपन्देही, कपिलवस्तुमा दैनिक कोरोना संक्रमितको संख्या बढीरहेको र अर्घाखाँचीमा पनि समुदाय स्तरमा कोरोना संक्रमित हुन लागेपछि निषेधाज्ञा गर्नुको कुनै विकल्प नभएको प्रशासनले जनाएको छ । निषेधाज्ञा थप भएको निर्णयको सुचना जिल्ला प्रशासनले केही समयमा प्रकाशन गर्ने सुचना अधिकारी थापाले बताए ।बैठकमा प्रमुख जिल्ला अधिकारी विष्णु पौडेल, प्रहरी नायव उपरिक्षक माधव बुढाथोकी, जिल्ला समन्वय अधिकारी, स्वास्थ्य कार्यालय, अर्घाखाँची अस्पतालका प्रमुख, सुरक्षाकर्मी लगाएतको उपस्थिती रहेको थियो ।