चाडपर्वमा चिल्लो खाद्य वस्तु कम खान पोषणविद्को सुझाव

काठमाण्डौ ४ कार्तिक । कोभिड–१९ सङ्क्रमणको जोखिम बढ्दै गएको अवस्थामा चिल्लो खाद्य वस्तु कम खान पोषणविद् डाक्टर मनसा थापा ठकुराठीले सुझाव दिनुभएको छ । दशैँको समयमा छोटो अवधिमा धेरै प्रकारका खाद्य वस्तु खाँदा रोग प्रतिरोधात्मक क्षमतामा कमी आउने डा. ठकुराठीले बताउनुभयो । खासगरी दशैँमा माछामासु, पेय पदार्थ, गुलियो पेय पदार्थ, मिठाईजन्य वस्तुहरुको उपभोग बढी गरिने प्रचलन रहेकाले त्यसलाई कम गर्न उहाँको सुझाव छ । कोभिड–१९ सङ्क्रमणसँग लड्न पनि खानेकुरामा विशेष ख्याल गर्नुपर्ने र दशैँको बेला ख्याल नहुन सक्ने भन्दै विशेष ध्यान दिन उहाँले जोड दिनुभएको छ ।

  मासु र दही शरीरका लागि आवश्यक खाद्य वस्तु भएकाले पनि ठिक मात्रामा खान आग्रह गर्नुभयो । तर पेय पदार्थ, गुलियो पेय पदार्थ, मिठाईजन्य वस्तु नखाँदा सबैभन्दा राम्रो गर्ने उहाँको भनाइ छ ।छोटो अवधिमा अनियन्त्रित किसिमबाट खानेकुरा खाँदा छिटो मोटोपन बढ्ने र त्यसले शरीरमा असजिलो ल्याउने मात्र नभइ रोगव्याधीसमेत आउन सक्ने भएकाले ख्याल गर्नुपर्ने डा। ठकुराठीले बताउनुभयो ।मोटोपन बढ्दा ब्लड प्रेसरमा उतार चढाव हुने, मुटुमा समस्या आउन सक्ने, रगतमा चिनीको मात्रा बढ्ने लगायतका समस्या आउने भएकाले पनि ध्यान दिनुपर्ने उहाँले बताउनुभयो । दशैँका बेला मुला, काँक्रो, कागतीको सेवन दैनिक रुपमा गर्न पनि उहाँको सुझाव छ ।