सुनको भाउ आज तोलामा ११ सय रुपैयाँले बढ्यो

काठमाण्डौ २१ पुष । सुनको भाउ आज तोलामा ११ सय रुपैयाँले बढेको छ ।आज सुनको भाउ ९६ हजार ४ सय रुपैयाँ पुगेको नेपाल सुनचाँदी व्यवसायी महासङ्घले जनाएको छ ।हिजो सुनको भाउ ९५ हजार ३ सय रुपैयाँ थियो । आज अन्तर्राष्ट्रिय बजारमा सुन प्रतिऔंस १९ सय ४० डलर पुगेको छ ।अन्तर्राष्ट्रिय बजारमा सुनको भाउ अझै बढ्ने सम्भावना रहेकाले नेपाली बजारमा पनि भाउ बढ्ने सम्भावना देखिएको नेपाल सुनचाँदी व्यवसायी महासङ्घका पूर्व अध्यक्ष तेजरत्न शाक्यले बताउनुभयो ।उहाँकाअनुसार अहिले अन्तर्राष्ट्रिय बजारमा डलर कमजोर  रहेकाले लगानीकर्ता सुनमा आकर्षित भएका छन् । यसले गर्दा भाउ अझै बढ्ने अनुमान गरिएको हो । यस्तै, आज चाँदीको भाउ तोलामा १० रुपैयाँले बढेर तोलाको १३ सय ३५ रुपैयाँमा पुगेको छ।