कपिलवस्तुमा जोनसन एण्ड जोनसन खोप लगाउने तालिका

कपिलवस्तु १२ साउन । कपिलवस्तुमा यहीँ साउन १३ र १४ गते जोनसन एण्ड जोनसन खोप लगाइने भएको छ । जिल्ला कोभिड १९ खोप समन्वय समितिको आइतबार बसेको बैठकले साउन १३ र १४ गते २ दिन उक्त खोप लगाउने निणर्य गरेको हो ।

जिल्ला कोभिड १९ खोप समन्वय समितिको निणर्यानुसार ५०-५४ वर्ष उमेर समूहका व्यक्तिहरु, अपांगता परिचयपत्र भएका व्यक्तिहरु (क र ख), विदेश जानु पर्ने व्यक्तिहरु र यस अघि प्राथमिकतामा परेर खोप नपाएका व्यक्तिहरुको लागि प्रत्येक वडाका स्वास्थ्य संस्थाहरुबाट खोप सेवा प्रदान गरिने जनाइएको छ ।

जिल्लाका यशोधरा गाउँपालिका, शुद्दोधन गाउँपालिका र मायादेवी गाउँपालिकामा १० गते देखि १४ गतेसम्म नियमित खोप कार्यक्रम चल्ने भएकोले उक्त पालिकाहरुमा जोनसन खोप साउन १५ र १६ गते लगाईने पनि बताइएको छ ।